УИХ-ын гишүүн Д.Хаянхярваа Засгийн газрыг огцруулах бичгийг УИХ-ын дарга М.Энхболдод өргөн барих гэж байна. Уг бичигт хэдэн хүн гарын үсэг зурсан нь тодорхойгүй байгаа юм. Одоогоор 26 гишүүн гарын үсэг зурсан гэх албан мэдээлэл байна.

Тэрбээр “Намын даргын болохгүй үйлдлийг би шүүмжилнэ. Нэг хүний дарангуйлал дотор энэ нам ормооргүй байна. Намын дарга болж бүтэхгүй зүйл ярьж, болчимгүй үйлдэл гаргаж байгаа учраас хэлэх ёстой газар нь үүнийг хэлж, алдаа оноог нь засах ёстой. Би өнөөдөр УИХ-ын гишүүн байгаа нөхцөлд бүлгийн даргын албан тушаал байх эсэх нь сонин биш. Өнөөдөр Монгол Улс хүчирхийлэл, дарангуйллын системээр явах зам руу орж байна. Жирийн МАН-ын гишүүд үүнийг ойлгох хэрэгтэй. Ер нь У.Хүрэлсүх гэдэг намын даргыг бид шүүмжилж болохооргүй болсон. Гишүүдийг доромжилдог, дарамталдаг, намын даргаа шүүмжиллээ гэж, намын даргын нэр хүнд өндөр, УИХ-ын нэр хүнд муу байгаа гэж яриад байгаа нь Үндсэн хуульд харш гэдгийг би хэлж байгаа юм. Иймд Удирдах зөвлөлийн хурлын үеэр би “Жижиг дунд үйлдвэрийг хөгжүүлэх сан /ЖДҮХС/-гаас зээл авсан гишүүдэд хариуцлага тооцохгүй бол Засгийн газрыг огцруулах үндэслэлүүдийг бичээд гарын үсэг цуглуулаад өргөн барина” гэж мэдэгдсэн. Энэхүү бичгээ яг одоо өргөн барих гэж байна.  Засгийг огцруулах бичиг өргөн барьсан тохиолдолд Ардчилсан намын бүлэг  болон МАХН-ын гишүүн О.Баасанхүү нар дэмжихээ илэрхийлээд байгаа юм.