УИХ-ын гишүүн Ц.Мөнх-Оргил Засгийн Газрыг огцруулах саналыг дэмжиж гарын үсэг зурсан. Түүнээс яагаад энэ саналыг дэмжсэн талаар тодрууллаа.
-Ямар үндэслэлээр Засгийн Газрыг унагаах бичигт гарын үсэг зурсан юм бэ?
-Нэгдүгээрт Засгийн Газрыг бус У.Хүрэлсүхийг огцруулах асуудлаар. Хоёрдугаарт Долоон үндэслэл гаргасан. Тэр долоон үндэслэл нь нэг нэгээрээ Ерөнхий сайдыг огцруулах хангалттай үндэслэл гэж үзэж байгаа. Долуулаа нийлэхээрээ гарцаагүй үндэслэл болж байгаа. Миний хувьд хамгийн гол асуудал Ерөнхий сайд У.Хүрэлсүх үндсэн хуулиар олгогдсон үүргээ сайн ухамсарлахгүй байна уу даа гэж бодож байгаа юм. Энэ хүн саяхан УИХ-ын индэр дээрээс би ажлаа хиймээр байна, шударга ёсыг тогтоомоор байна, даанч Үндсэн хууль болохгүй байна. Үндсэн хуулийг өөрчилж өг, шүдгүй боллоо” гэсэн мэдэгдэл хийсэн. Иргэн хүний хувьд ямар ч мэдэгдэл хийж болно гэхдээ Монгол Улсын Ерөнхий сайдын хувьд Монгол Улсын хууль тогтоомжийг бүхэлд нь улс орон даяар хэрэгжүүлэх үүргийг улс орон даяар хариуцаж байгаа ийм хүн “Үндсэн хууль болохгүй байна, би ажлаа хийж чадахгүй байна” гэсэн мэдэгдэл хийх ёсзүй, хууль зүйн эрхгүй. Үнэхээр хууль тогтоомж нь болохгүй байгаа бол ажлаа өгөөд Үндсэн хуулийг өөрчлөх асуудалд ханцуй шамлаж болно. Ер нь Ерөнхий сайд байтугай ямар ч төрийн албан хаагч энэ хууль болохгүй байгаа учир үүрэгт ажлаа биелүүлэхгүй гэж хэлж болохгүй шүү дээ.
Монгол Улсын Үндсэн хуульд улс орны нийгэм, эдийн засаг, гадаад дотоод бодлогыг хэрэгжүүлэх гээд маш олон үүрэг даалгавар Засгийн Газарт өгсөн байгаа. Үндсэн хуулиар Ерөнхий сайдад биечлэн хоёрхон үүрэг олгогдож байгаа. Нэгдүгээрт Засгийн Газрыг удирдах, хоёрдугаарт төрийн хуулийг хэрэгжүүлэх ажлыг УИХ-ын өмнө хариуцна гэж байгаа юм. Энэ бол биечлэн хариуцах үүрэг нь. Хоёрдугаарт энэ хүн УИХ-ын индэр дээрээс “Би УИХ-д хариуцлага тооцно” гэж байгаа юм. Тэгэхээр нь та Ерөнхий сайдын хувьд УИХ-тай хариуцлага тооцдоггүй, УИХ тантай хариуцлага тооцдог юм гэхээр “Үгүй ээ, би Ерөнхий сайдын хувьд биш намын даргын хувьд хариуцлага тооцно” гэж ярьж байгаа юм. Энэ бол зүгээр нэг хэлсэн үг биш алдаатай мэдэгдэл. Магадгүй энэ аюултай үр дагавартай мэдэгдэл байж магадгүй гэж үзэж байгаа. Энэ хүн нам төр хоёр тусдаа болсон гэдгийг ялгахгүй байна. Намын дарга УИХ, төрийн байгууллагад хариуцлага тооцож болдог юм шиг бодож байна. Бид нам төр салсан талаар Ерөнхий сайдад олон удаа хэлсэн. УИХ бол төрийн байгууллага нам төрийн бус байгууллага. Ямар ч төрийн бус байгууллага ямар ч мундаг даргатай байсан төрийн байгууллага тэр тусмаа УИХ-д хариуцлага тооцдог зүйл байхгүй. Тиймээс энэ хүн нам төрийн байгууллагаа ялгахгүй байна. Үндсэн хуулийн ерөнхий үзэл баримтлал өөрийнхөө ажлыг ойлгохгүй байна.
Гуравдугаарт энэ хүн УИХ-ын индэр дээрээс би ард түмнээсээ дэмжлэг хүснэ гэж байгаа. Одоо энэ үгийг ойлгож эхэлж байна. Энэ нь жагсаал цуглаан зохион байгуулах гэж байгаа юм байна. тэгэхээр Монгол Улсын Ерөнхий сайд хүн УИХ-д олонхыг бүрдүүлж байгаа намын дарга парламентаас гадуур улс төрийн тэмцэл хийх эрх байхгүй. Энэ чинь хориотой зүйл. Иргэд хуулиар жагсаал, цуглаан зохион байгуулах, үзэл бодлоо илэрхийлэх эрхтэй.
-Таныг Хуульзүйн сайд болно гэсэн яриа гарч байна?
-Тийм яриа байхгүй. Хэн ч хэндээ ямар ч албан тушаал амлаагүй. Надад тийм сонирхол, эрмэлзэл алга. Миний гол яриад байгаа болгоомжлол Монгол төрийн гүйцэтгэх засаглалын тэргүүн Ерөнхий сайд хүн Үндсэн хуулиар олгогдсон үүргээ яг таг мэддэг, чандлан биелүүлдэг байх ёстой. Тэгэхгүй бол энэ улс оронд хууль биелүүлдэг хүн байхгүй, эмх замбараагүй байдал бий болж төр гэдэг зүйл байхгүй болно.
-Шинэ Засгийн газар бүрдлээ гэхэд танд саад болох амбиц бий юу?
-Шинэ Засгийн Газрын талаар хэн ч яриагүй байна.
-Засгийн Газрыг огцруулах саналд гарын үсэг зурсан гишүүд дунд ЖДҮДС-аас зээл авсан хэд хэдэн гишүүн байгаа. Энэ нь зарчмын хувьд хэр зөв юм бэ?
-ЖДҮДС-аас зээл авсан гишүүд ёсзүйгээр шийдэгдэнэ. Ёсзүйн дэд хороогоор УИХ-ын гишүүд орно. Бидний оруулж байгаа асуудал Засгийн Газрын гишүүддээ хариуцлага тооцохгүй Үндсэн хуулиа умартаж байгаа мөн Монголын тусгаар тогтнол аюулгүй байдалд занал учруулсан энэ асуудалд хариуцлага тооцохгүй байгааг хэлж байгаа юм.
Р.Хишигжаргал
Сэтгэгдэл (24)