Ерөнхийлөгчийн төсөвт тавьсан хориг болоод цаг үеийн зарим асуудлаар Ерөнхийлөгчийн Тамгын Газрын дарга З.Энхболдоос тодрууллаа.
-Хуульзүйн байнгын хорооны хурлаар Ерөнхийлөгчийн төсөвт тавьсан хоригийг хүлээж авсангүй. Хүлээж аваагүй шалтгааныг нь та юу гэж харж байна?
-Ерөөсөө хүлээж авахааргүй шийдсэн. Янз бүрийн худлаа шалтаг хэлж байна. Д.Оюунхорол гишүүний ажлын хэсэг төсвийг шинээр хийгээд бэлэн болгосон байгаа. Ерөнхийлөгчийн хэлсний дагуу засвараа хийгээд түүнийг сангийн яам аваад тэр өдөр буцааж Засгийн Газрын хурлаар оруулбал болох юм. Ахиж яамдаас санал авах шаардлага байхгүй. Тэгэхээр Ц.Мөнх-Оргил, Н.Оюундарь нарын яриад байгаа бүгд худлаа. Ажлаа мэдэхгүй байгаа юм.
-Хэсэгчилж хориг тавих боломжгүй байсан юм уу?
-Яагаад хэсэгчилж хориг тавиагүй вэ гэхээр энэ төсөв дундаас нэгийг аваад нөгөө талд нь оруулахаар нааш цааш нь хөдөлгөж болох эрх чөлөө нь болдоггүй юм. Жишээ болгож ярихад бүхэлд нь тавихгүй болохоор 2.1.3-ийг хасаад 2.3 дээр нэмнэ гэдэг нь хэсэгчилж тавина гэж байгаа юм. Тэгэхээр хаана хаанаас хасаад хаана нэмэхийг Ерөнхийлөгч хэлэх боломжгүй. Энэ нь Засгийн Газар, УИХ-ын ажил. Тиймээс хаанаас юуг хасаад хаана нэмэх бүрэн эрх чөлөөтэй хийж болохыг Ерөнхийлөгч хэлж өгч байгаа. Хэсэгчлэн тавих юм бол хөдөлгөх боломжгүй.
-Хоригт 500 тэрбум төгрөгийг тусгахгүй байх боломжгүй байсан юм уу?
-Үндсэн шаардлага нь энэ. Уул уурхайгаас хараат болж, жил бүр гардаг 15 сая малынхаа түүхий эдийг боловсруулдаг болохгүй бол жил бүр хямралд өртөх юм уу гэж байгаа юм. Төсвийн байнгын хороо болон гишүүд нэг зүйлийг буруу яриад байна. 42 сая тонн нүүрс зарна. 70, 80 доллар гэж буруу яриа байна. Хятад улс хоёр сар нүүрс авахаа болчихлоо. Ирэх жил авах үгүй нь мэдэгдэхгүй. Ийм байхад төр Засгаас 15 сая нүүрс илүү зарж, илүү үнээр зарна гэж байгаа бол зүгээр хорлож байгаа юм. Тэгэхээр энд бичсэн 15 их наядын зарлага бол худлаа гэсэн үг. Нүүрснээс бид нэг, хоёр тэрбум төгрөгийн орлого олж байгаа. Энэ орлого нь алга болбол яах юм бэ, хил хаавал яах юм бэ. Австралиас ч, Оросоос ч Монголоос ч авахгүй гэвэл яах юм бэ. Ийм найдваргүй төсөөлөл хийснийг ганц Ерөнхийлөгч хэлээд байгаа юм биш АУДИТ-ын байгууллага төсвийн анхны хэлэлцүүлэгт “энэ чинь худлаа байна шүү дээ” гэж хэлсэн. Тэрийг засах бололцоо байсаар байтал, Ерөнхийлөгчийн 10 дугаар сарын 1-нд төсөв хүлээж авдаг 10 дугаар сарын 12-ноос өмнө нэгдүгээр хэлэлцүүлэг явсан. 10 дугаар сарын 12-нд хоёрдугаар хэлэлцүүлгийн төгсгөл рүү орж байгаа юм. Тиймээс засах бололцоо их байсан. Гурав, дөрөвдүгээр хэлэлцүүлэгт засаагүй. Ерөнхийлөгч, Засгийн Газрын хооронд хамтын ажиллагаа явсан. Ингэж байж уул уурхайн хямралаас гарах юм байна, ирэх жил олон сая тонн нүүрс зарагдахгүй байх магадлалтайг ойлгосон. Гэхдээ яг засвар хийх болохоор намаар ялгараад кнопдоод байна. Уг нь Л.Болд, Ж.Батзандан хоёр ирсэн бол хүлээж авах байлаа. Хоёрхон кноп дутлаа.
-Хоригийг хүлээж авахгүй бол дахин хориг тавих уу?
-Дахиж хориг тавих боломж байхгүй. Энэ чинь тав хоногийн дотор тавьдаг. Ингээд дуусч байгаа юм.
-Таны нэр ЖДҮДС-тай холбогдсон байгаа. Та зээл авсан уу?
-Нэр дурдагдаж байгаа компаниудтай ямар ч холбоогүй.
-Таныг ажлаа өгөх гэж байгаа гэсэн мэдээлэл явж байна. Таныг ажлаа өг гэж шахсан уу?
-МАН-аас төлбөртэй мэдээ тавьсан байна лээ. МАН-ын хүслийг Ерөнхийлөгч биелүүлэхгүй. Бид хоёр ажлаа өгөх тухай огт яриагүй. Энэ тавьсан цуурхлууд бүгд худлаа. МАН-аас төлбөртэй тавьсан нь нотлогдож байгаа.
Р.Хишигжаргал
Сэтгэгдэл (12)