Өчигдөр МАН-ын хяналтын хороо хуралдаж нэр бүхий таван гишүүнийг намаасаа хөөх шийдвэр гаргасан ч уг шийдвэрийн тогтоол гараагүй, хүчингүй гэсэн мэдээллийг МАН-ын Хяналтын хорооны гишүүн Х.Болдмандал өгсөн. Энэ талаар Н.Номтойбаяраас тодрууллаа.
-Та болон нэр бүхий гишүүдийг намаас хөөх шийдвэр гарсан ч Ц.Нямдорж гишүүн загнаад болиулсан гэсэн мэдээлэл байна?
-Ц.Нямдорж сайд загнаж байхыг нь хараагүй, сонссон. Үнэний ортой. МАН өнгөрсөн их хурлаараа 15 гишүүний бүрэлдэхүүнтэй хяналтын хороог томилсон. Даргаар нь тогтоол гаргаж Д.Батбаатар гэж хүнийг томилсон. Хяналтын хороо өчигдөр хуралдаж, 11 гишүүний ирцтэй хуралдаж хэлэлцэх асуудлаа баталсан хэдий ч дундуур нь хяналтын хорооны дарга нь нэр бүхий гишүүдийг хөөх асуудлыг нэмж оруулсан. Санал хураахад энэ бол дүрмийн бус ажиллагаа гэж нэг хүн эсэргүүцсэн, загнуулсан. Санал хураалтад оролцсон 11 гишүүний 10 нь дэмжсэн. Тогтоолын төслөө бэлдсэн байх ёстой, гэвч бэлдэх гэж 3 цаг ноцолдсон ч чадаагүй. Учир нь дүрмийн зохицуулалт байхгүй. Намын анхан шатны байгууллагаас шийддэг. Миний хувьд Дорнод аймгийн МАН-ын хороонд харъяалагддаг. Энэ мэдээлэл хэвлэл мэдээлэл, олон нийтийн сүлжээнд задарч, УИХ-д шуугиан тарьсан, намын дарга У.Хүрэлсүхэд сөргөөр нөлөөлсөн. Шалтгаантай гэж үзэж хөөж байна. Удалгүй гаргасан шийдвэрээ буцааж, худлаа мэдээлэл өгсөн. Д.Батбаатар худал мэдээлэл өгснөөр хяналтын хорооны 10 гишүүний санал хүчингүй болохгүй. Гаргасан шийдвэрээ хүчингүй болгоогүй. Хэвээр батлах, хүчингүй болгох талаар дахин хуралдаагүй.
-Тогтоолыг нь та харав уу?
-Тогтоолоо үйлдэж чадаагүй. Намын дүрэмд маш тодорхой бий. Би тогтоолооо хүлээгээд намын батлахаа өгөх гээд хүлээгээд байна. Өчигдөр сонсоод намынхаа батлахыг өвөртлөөд явж байна.
-Намаас хөөх шалтгааныг та юу гэж бодож байна?
-Тогтоол гараагүй, ямар шалтгаанаар хөөж байгаа нь тодорхойгүй байгаа учраас энэ намын эсрэг юу хийсэн юм бол, Монгол Улсын ямар хууль тогтоомж зөрчсөн юм бол, сүүлийн үед улстөрийн хүрээнд хийсэн үйлдэл, хэлсэн үг минь буруу юм болов уу гээд бодож байна. Буруу зүйл байхгүй. Бүлгийн дарга Д.Тогтохсүрэн буруу ташаа мэдээлэл өгч байхад нь би орж залруулсан. ЖДҮХС-аас олон сайд нэг дор ижил хэмжээтэй мөнгө авсан, УИХ-ын гишүүнийхээ бүрэн эрхийн хүрээнд түр хороо байгуулсан. Ийм л шалтаг юм болов уу гэж бодож байна.
-Тогтоолын төсөл гарчихвал намынхаа батлахыг өгөх юм уу?
-Өгнө. Өвөртлөөд явж байна.
-Дүрмийн бус шийдвэр гэж та өөрөө хэлсэн. Тийм байсан ч өгөх юм уу?
-Тийм. 2017 онд намын их хурлаар дүрмийн өөрчлөлтийг хийсэн. Дээд шүүхэд бүртгэлтэй дүрэм.
-Таныг ХҮНамд орно гэсэн мэдээлэл байна.
-Үгүй. Би намд биеэ үнэлж явдаг хүн биш.
Р.Хишигжаргал
Сэтгэгдэл (78)