2016.04.14
Байгаль орчны иргэний зөвлөлийн хяналтын хорооны дарга Ж.Ганбаатар:Ерөнхийлөгч Ц.Элбэгдорж 2015 оны тавдугаар сард Франц улсад айлчлал хийгээд ирэхдээ “Арева”-д ашиглалтын лиценз өгсөн.
2018.07.18 tug.mn
УИХ-ын гишүүн Б.Дэлгэрсайхан:”Арева” гурван А лицензтэй. “Арева”-д УИХ-ын сонгууль болсноос хоёр хоногийн дараа аймгийн дарга асан Д.Ганхуяг аймгаас зөвшөөрөл өгөөд, тухайн үеийн Ашигт малтмалын газрын дэд дарга Д.Үүрийнтуяа А лиценз олгосон байдаг.
Манай улсад 1996 оноос үйл ажиллагаа явуулж эхэлсэн Францын алдарт “Арева” групптэй холбоотой олон зүйл яригддагаас Ашиглалтын лицензийг хэрхэн авсан талаарх дээрх хоёр эрхмийн ярианаас эш татлаа. Учир нь одоо хүргэх мэдээлэл мөн л энэ групп Монголын төрөөс ураны Ашиглалтын лицензийг хууль ёсоор аваагүй байж мэдэх тухай байгаа юм. Өнгөрсөн хоёр долоо хоногт У.Хүрэлсүхийн Засгийн газрын огцрох эсэхийг хэлэлцэх халуун үйл явдал дундуур АТГ-ын нэгэн баривчилгаа нам гүмхэн өнгөрсөн. Энэ нь Италийн Элчин сайдын яаман дээрээс Уул уурхайн дэд сайд байсан Оюуны Эрдэнэбулганыг баривчилсан үйл явдал байлаа. У.Хүрэлсүхийн Засгийн газрын хувь заяаг шийдэх халуухан тэмцлийн дундуур ганц нэгхэн хэвлэл мэдээллийн хэрэгслээр энэ баривчилгааны тухай мэдээлэхдээ АН-ын Засгийн газрын үед хэрэгжүүлсэн Үнэ тогтворжуулах хөтөлбөртэй холбоотой мэтээр тайлбарлаж байсан нь үнэнээс хол зөржээ. Харин ураны лиценз олгоход нөлөөлж, авлига авсан байз болзошгүй гэсэн үндэслэлээр түүнийг саатуулсан юм байна. О.Эрдэнэбулганыг Уул уурхайн дэд сайдаар ажиллаж байсны дараа, 2015 онд “Арева” групп Дорноговийн Дулаан-Уул, Зөөвч-Овоогийн ураны А лиценз авсан байдаг юм. Ингэснээр ураны хайгуулын 49 лицензийн 27-г нь, ашиглалтын таван лицензийн гурвыг нь алдарт “Арева” эзэмшихээр болж байсан юм. Бүр тодруулбал, 2015 оны зургадугаар сарын 12-нд, Ерөнхийлөгч Ц.Элбэгдорж Европын парламентын Ерөнхийлөгчийн урилгаар Францад ажлын айлчлал хийснээс хоёр хоногийг дараа “Арева”-д ашиглалтын лицензийг гардуулж өгч байлаа. Энэхүү үйл явдлаас нэгхэн сарын өмнө Ерөнхийлөгч Японп айлчилж, Ерөнхий сайд Абэтэй ээлзаад ирсэн зэрэг нь тухайн үедээ бас л багагүй хардлага дагуулж байсан. Айлчлалын хадаг нь “Арева”-гийн лиценз болов уу, Абэтэй цөмийн хаягдлыг Монголд булшлах талаар ярилцав уу гээд хардах эрхийнхээ хүрээнд сэтгүүлчид хангалттай л бичицгээж байлаа, тухайн үед. Харин энэ удаа “Арева”-гийн ашиглалтын лиценз ариун цагаанаар очоогүй юм байна гэдгийг батлах нэг үндэслэл нь саяхан болсон баривчилгаа болох шиг боллоо. О.Эрдэнэбулган “Арева”-д А лиценз олгох үед ямар нэгэн төрийн албан тушаал хашиж байгаагүй бөгөөд харин энэ хэрэгт зуучилсан байж магадгүй гэж сэжиглэгдсэн бололтой. Энэ хэрэгтэй холбогдуулан тухайн үеийн “МонАтом”-ын захирал, одоо АНУ-ын Санфранцискогийн консул Э.Галбадралыг мөн шалгаж магадгүй байна. Түүнийг Ерөнхийлөгч асан Ц.Элбэгдоржийн ойрын хүн гэдэг билээ.
Хэдийгээр АТГ О.Эрдэнэбулганыг “Арева”-гаас авлига авсан байж болзошгүй гэж сэжиглэж байгаа ч ураны ашиглалтын асуудлыг ҮАБЗ-өөр хэлэлцдэж, шийдвэр гаргадаг. “Арева” групп ашиглалтын лиценз авч байсан тэр үед ҮАБЗ-ийн гишүүнээр Ерөнхийлөгчөөр Ц.Элбэгдорж, УИХ-ын даргаар З.Энхболд, Ерөнхий сайдаар Ч.Сайханбилэг нар ажиллаж байлаа.
Дашрамд дурдахад манай улс ураны нөөцөөрөө дэлхийд эхний 16-д, Азид зургаад жагсдаг.
О.Балдан-Очир
Сэтгэгдэл (15)