Сүрьеэгийн нөхцөл байдал болоод уг өвчинтэй холбоотой улс төрийн нөхцөл байдлын талаар Эрүүл мэндийн сайд Д.Сарангэрэл мэдээлэл хийлээ.

Тэрбээр “Сүүлийн өдрүүдэд АН-ын Эрүүл мэндийн бодлогын зөвлөлийн дарга, Монгол Улсын Ерөнхийлөгчийн зөвлөх Ж.Амарсанаа эрүүл мэндийн салбар, эрүүл мэндийн сайд руу дайрч доромжилон жагсаал цуглаан хийсэнтэй холбогдуулан албан ёсны мэдэгдэл хийж байна. Эрүүл мэндийн яам дахь мэргэжлийн зөвлөл үндэсний хэмжээнд хийсэн сүрьеэгийн тархалтын анхны судалгаанд үндэслэн урьдчилан сэргийлэх үзлэг явуулж байна. Үүний үр дүнд сүрьеэгийн халдвар өвчлөлтийг эрт илрүүлэн эмчилж байна. Энэ үзлэгийг цаг алдалгүй зохион байгуулаагүй бол сургуулийн сурагчдын эрүүл мэндэд ямар эрсдэл учрах байсныг төсөөлөхөд ч бэрх юм. 1990 оноос хойш дахин сэргэсэн халдварт сүрьеэ өвчин дэлхий нийтийн асуудал болсон. Тиймээс 2017 онд сүрьеэгийн асуудлаар Москва хотод эрүүл мэндийн салбарын их хурал, 2018 онд НҮБ-ийн Ерөнхий асемблэй түүхдээ анх удаа сүрьеэгийн асуудлыг тусгайлан авч хэлэлцлээ.

ДЭМБ-ийн мэдээллээр дэлхий дээр жилд 10.4 сая хүн сүрьеэгээр өвдөж 1.8 сая хүн нас барж байна. Үүний 45 хувь нь Энэтхэг, ОХУ, БНХАУ-д бүртгэгдсэн.

Монгол Улсын Засгийн газар энэ асуудалд анхаарал хандуулж, Халдварт өвчинтэй тэмцэх үндэсний хөтөлбөр баталсны дотор сүрьеэгийн талаар авах арга хэмжээ онцгойлон туссан байдаг. 2018 оны аравдугаар 1-нээс эхлэн Эрүүл мэндийн даатгалын сангаас санхүүжүүлж, орон даяар анх удаа 18-44, 35-45, 46-64, 65-аас дээш насныханд дөрвөн багцаар урьдчилан сэргийлэх үзлэг хийж байна. Энэ үзлэгт сүрьеэгийн тохиолдол түлхүү бүртгэгдэж байгаа 18-34 насны иргэдийг хамруулсан. Мөн Ерөнхий боловсролын сургуулиудад урьдчилан сэргийлэх үзлэгийг газар дээр нь очиж хийж байна. Өнөөдрийн байдлаар тандалтад үндэслэн 90 сургуульд хамрагдахаас 25-ыг нь хамруулсан.

Сүрьеэгийн өвчлөлийн 47 тохиолдлын илрүүлж, эмчиллээ. Цаашид ч энэ ажил үргэжилнэ.

Эрт илрүүлэг, эмчилгээ, эмч мэргэжилтнүүдийн нөр их хөдөлмөрийн үр дүнд сүрьеэгийн тохиолдол жил ирэх тусам буурч байна. 2013 онд 4111 тохиолдол, 2014 онд 4172 тохиолдол, 2015 онд 4270 ториолдол, 2016 онд 4045, 2017 онд 3779, 2018 онд 3498 тохиолдол бүртгэглдсэн. Цаашид бодлогын хүрээнд сүрьеэгийн тохиолдлыг эрчимтэй бууруулах зорилготой ажиллаж байна” гээд Засгийн газар энэ онд таван рентген аппаратны зардлыг шийдсэн талаар танилцууллаа.

Р.Хишигжаргал