Төрийн ордонд сархад зооглож, хөлчүүрхдэг гишүүдийн эрээ цээргүй байдал хавтгайрлаа. Тухайлбал, хэдхэн хоногийн өмнө Ерөнхийлөгч Х.Баттулга чуулганы индэрээс “... Наад зах нь Төрийн ордны тухай хуулийн заалтуудыг ноцтойгоор зөрчиж, албан тасалгаандаа согтууруулах ундаа хадгалах, хэрэглэх байдал даамжирснаас эрдэнэт хүний амь сүйдэх нөхцөл ч үүсчээ...” хэмээн хэлснийг хэвлэлийнхэн онцолж байна. Мөн УИХ-ын гишүүн Ж.Батзандан тэргүүтэй гишүүдийг өрөөндөө дуудаж “Архидалтаа боль, наад архидалт чинь хүний аминд хүрээд байна” гэж хэлснийг чуулганы хуралдааны үеэр онцлов.

Эндээс дүгнэхэд энэ сарын 17-ны тус үйл явдлыг хэлсэн байх магадлал өндөр байгаа юм. Ерөнхийлөгч Х.Баттулга ч “албан тасалгаандаа” гэж цохон тэмдэглэснээс үзвэл Төрийн ордонд гэж харахаас өөр аргагүй.

Жишээ нь, “Хятад руу ажлын айлчлалаар явсан гишүүд өдрийн хоолны үеэр БНХАУ-ын дарга Си Жиньпиний өгсөн архийг задалсан” хэмээн гишүүн Н.Номтойбаяр мэдээлэл хийх үеэрээ хэлэв. Мэдээж Төрийн ордонд болсон нь тодорхой.

Ер нь сонсоод байхад УИХ-ын гишүүд давхар дээлтэй, гуншинтай болох үедээ чимээгүйхэн сөгнөчихдөг асуудал гардаг тухай яриа Төрийн ордноор явдаг нь нууц биш ээ. Сонгуулийн ялалтын дараа хөлчүүрхсэн гишүүд олширдог тухай яриа оргүй биш ортой.

Уг нь Төрийн ордон гэдэг тусгай хамгаалалтай обьект. Нэвтрэх үүднээс эхлээд энгийн нэгэн ороход хувцаслалтаас өгсүүлээд нарийн дэг журам энд үйлчилдэг, мөрддөг. Гэтэл тэнд суугаа, хууль тогтоох дээд байгууллагыг бүрдүүлж байгаа төрийн түшээд ямар үйлдэл гаргаж, бусдадаа хэрхэн үлгэрлэж байна вэ.

Тусгай хамгаалалттай, онцгой обьектэд өмнө нь архидан согтуурсан тохиолдол гарч л байсан. Бүр эмэгтэй гишүүн. Үүнээс харахад гишүүд ажлын байран дээр, ялангуяа төрийн ордонд архи уух явдал байдаг гэдгийг гэрчилж байна. 

Уг нь Төрийн байгууллагын ажлын байранд согтууруулах ундаа, хүйтэн зэвсэг хадгалж, хэрэглэвэл ажлаас халах Засгийн газрын шийдвэр гараад жил өнгөрчээ. Тодруулбал, өнгөрсөн оны наймдугаар сарын 9-нд Зам, тээврийн хөгжлийн яамны дарга нар ажлын байран дээрээ хөлчүүрхэж, нэгэн залууг дуудаж, улмаар амь насыг нь хөнөөсөн хэрэг гарснаас хойш энэ явдлыг хориглосон юм.

Гэвч хууль батлан гаргадаг төрийн удирдах дээд байгууллага нь гүйцэтгэх байгууллагынхаа үйл ажиллагааг ингэж үгүйсгэж байхад доод шатныхныг яаж ч буруутгаж, хориглоод ямар үр дүн гарах вэ. Өөрсдөө хуулийг батлан гаргадаг мөртлөө дүрэм, журамгүй мэт аашилдаг тэднээс ёс зүй, хариуцлага нэхээд ч олдохгүй байх.

Ичих нүүрэндээ элгээ ингэж хэд хэд давхарласан хүмүүсийг хайя гэвэл эндээс Төрийн ордноос л хайж болохоор боллоо.

Б.Лхам