Нийслэлийн Засаг дарга бөгөөд Улаанбаатар хотын Захирагч С.Амарсайхан өнгөрсөн лхагва гараг буюу 29-нд "Иргэдийн төсөв-2019" эмхэтгэлийг танилцуулах хэвлэлийн хурлын дараа үүссэн асуудлын талаар тайлбар өгсөн юм.

Энэ үеэр МСНЭ-ийн Ерөнхийлөгч Х.Мандахбаяртай холбоотой асуудлыг хуулийн байгууллагаар шалгуулна гэж хэлж байсан.

Тэгвэл өчигдөр хотын дарга С.Амарсайхан Тагнуулын ерөнхий газар болон Цагдаагийн ерөнхий газарт албан ёсоор гомдол гаргажээ.

Уг гомдолд “Хотын Захирагч миний хувийн болон ажил хэргийн нэр хүндэд удаа дараа халдаж, цаашлаад өвөг дээдэс, удам судрыг минь зохион байгуулалттайгаар илтэд гүтгэн, гутаан доромжилж буй хүмүүсийн энэхүү үйлдэл нь нийслэлийн төрийн албанд шударгаар ажиллаж буй албан хаагчид, эгэл жирийн иргэдэд ч хамаатай бөгөөд цаашлаад олон нийтийг талцуулах, нийгмийг хагалан бутаргах уршигтай тул Эрүүгийн хуулийн 19.9-д заасанчлан “Үндэсний эв нэгдлийг бусниулах” гэмт хэргийн  шинжтэй гэж үзэж байна. Тиймээс дээрх этгээдүүдийн үйлдэлд эрүүгийн хэрэг үүсгэн шалгаж, үнэн мөнийг тогтоолгох хүсэлт гаргаж байна” гэжээ.

Б.Лхам