"Бөх бол төр” юм гэж хэлээд манай үндэсний бөхийн залуу аварга улс төрд орж ирсэн. Үүн шиг “Төр бол ураг төрөл” юм гэдэгт өнөө цагийн монголчууд итгэхээс өөр аргагүй болж байна. Баянгол дүүргийн ИТХ, Засаг даргын Тамгын газар, түүний харьяа агентлаг, улсын үйлдвэрийн газар, хороодын дарга, удирдах албан тушаалтнуудыг харахад ингэж бодохоос аргагүйд хүрнэ. Энэ дүүргийг “Эрдэнэ ван”-гийн хошуу гэж нэрлэдэг нь ч үүнтэй холбоотой. Хүлээн зөвшөөрөхөөс аргагүйд хүрнэ. Тэнд үр хүүхэд, хамаатан садан, ураг төрлөөрөө төрийн албыг хашиж, засгийн ажлыг залж байгаа нь УИХ-ын гишүүн, АН-ын дарга С.Эрдэнийн гайхамшиг гэхээс өөр арга алга.

Үүнийг л гайхамшиг гэхгүй юм бол өөр юуг гайхамшиг гэх билээ. С.Эрдэнийн энэ гайхамшгийг холоос хайх хэрэггүй. 2012-2016 онд бүрэн эрхээ хэрэгжүүлсэн Баянгол дүүргийн ИТХ-д С.Эрдэнийн эхнэр, хүү, охин нь төлөөлөгчөөр сонгогдон ажиллаж байсан нь ураг төрлөө улс төрд дархалсных нь бодит жишээ болж үлдсэн юм. Баянгол дүүрэгт өдгөө бүрэн эрхээ хэрэгжүүлж байгаа ИТХ, Засаг даргын Тамгын газар, хороо гээд төр захиргааны шат шатны байгууллагад “Эрдэнэ ван”-гийн удам угсааныхан тамга атгаж байна.  

Эхнэр, хүүхэд. С.Эрдэнийн эхнэр Н.Нинжбадгар нь эдүгээ Баянгол дүүргийн Ардчилсан эмэгтэйчүүдийн холбооны даргаар ажиллаж байгаа. Харин хүү Э.Ганболор нь Хан-Уул дүүргийн Ардчилсан намын дэд даргын албан тушаалыг хашиж байна.

Баянгол дүүргийн ИТХ-ын дарга Г.Энхболд гэхэд С.Эрдэнийн хүргэн. Өөрөөр хэлбэл, төрсөн охин Э.Содгэрэлийнх нь нөхөр. Г.Энхболд хадам аавыгаа Нийгмийн даатгалын ерөнхий газрын дарга байхад Сүхбаатар дүүргийн Нийгмийн даатгалын хэлтэст хяналтын байцаагч, сайд болж дэвшихэд нь Баянгол дүүргийн Засаг даргын орлогчоор ажиллаж байжээ. Тэрбээр мөн Баянгол дүүргийн Ардчилсан намын даргын үүрэг гүйцэтгэгч ажээ.

Хамаатан. Баянгол дүүргийн ИТХ-ын төлөөлөгч Ө.Жаргалсайхан С.Эрдэнэ гишүүний хамаатан. Тэрбээр “ОБ пресс" ХХК-д менежер ажиллаж байсан бөгөөд дүүргийн АН-ын бүх хэвлэх зүйлсийг хариуцдаг гэнэ. Баянгол дүүргийн ИТХ-ын төлөөлөгч Б.Алтангэрэл С.Эрдэнийн хамаатан бөгөөд 2012-2016 онд Баянгол дүүргийн наймдугаар хорооны Засаг даргаар ажиллаж байжээ. Баянгол дүүргийн ИТХ-ын төлөөлөгч Б.Лхагвасүрэн мөн л хамаатан нь. Тэрбээр С.Эрдэнийн хамаарал бүхий “Төгс эрдэм” сан, С.Эрдэнийн үүсгэн байгуулж, хүү нь захирлаар ажиллаж байсан “Молор констракшн” ХХК-д менежерээр ажиллаж байсан нэгэн. С.Эрдэнийн үед Нийгмийн даатгалын ерөнхий газрын БНСУ дахь гадаад харилцааны албанд мөн л менежерээр ажилласан нь намтарт нь дурайж байх аж.  

Баянгол дүүргийн ИТХ-ын төлөөлөгч Д.Нарангэрэл С.Эрдэнэ гишүүний бие төлөөлөгч, туслахаар нь ажиллаж байгаад Баянгол дүүргийн ИТХ-ын Ажлын албанд иргэний оролцооны хэлтсийн даргаар ажиллаж байсан нэгэн.

Г.Нарангэрэл Баянгол дүүргийн ИТХ-ын төлөөлөгч бөгөөд С.Эрдэнийг ХАХНХ-ын сайд байхад яамных нь Төрийн захиргаа удирдлагын газрын дарга, Төрийн нарийн бичгийн даргаар ажиллаж байснаас харахад С.Эрдэнийн маш ойрын, итгэлт хүн ажээ. Мөн Баянгол дүүргийн Засаг даргын орлогчоор ажиллаж байжээ. Баянгол дүүргийн ИТХ-ын төлөөлөгч Ш.Давааням 2012-2016 онд Баянгол дүүргийн зургадугаар хорооны Засаг даргаар ажиллаж байжээ. С.Эрдэнийн хамаатан Д.Дорждулам, түүний хүү С.Мөнгөнтулга нар эдүгээ Баянгол дүүргийн ИТХ-ын төлөөлөгчөөр ажиллаж буй юм. Хэн хэн нь Баянгол дүүрэгт хорооны Засаг даргаар ажиллаж байжээ.

Намтар нь олон нийтэд ил байдаг ИТХ-ын төлөөлөгчдийг шүүж үзэхэд С.Эрдэнийн хамаатан садан дурайж байгааг эндээс харж болно. Тэр бүр олны анхааралд өртдөггүй төрийн алба, төрийн өмчит үйлдвэрийн газрууд, сургууль, цэцэрлэг зэрэгт УИХ-ын гишүүн С.Эрдэнийн хамаатан садан, ураг төрлийнхөн байж мэднэ. Ингэж хардах үндэслэлийг дүүргийн ИТХ-ын төлөөлөгчдийн жишээ өгүүлэх мэт.

С.Сүлд