С.Зоригийн амь насыг хохироосон хэргийг хянан шалгах Түр хорооны гишүүд цаг үеийн асуудлаар мэдээлэл хийлээ. Энэ үеэр Түр хорооны дарга Ж.Батзандан “С.Зоригийн амь насыг хөнөөсөн хэрэгт холбогдуулж Б.Содномдаржаа, Т.Чимгээ нарыг эрүүдэн шүүсэн асуудлаар ОУПХ-ны дүгнэлтийг судлах Түр хороо албан ёсоор байгуулагдсаныг мэдэж байгаа байх. Түр хороо байгуулагдсанаас хойш нэг сарын хугацаанд олон ажил хийлээ. Өнөөдөр ОУПХ-ны гишүүдтэй уулзлаа. Тэд Б.Содномдаржаа, Т.Чимгээ, Ц.Амгаланбаатар нартай уулзах болон гурван шатны шүүхийн шийдвэртэй танилцах хүсэлт тавьсан. Анхан шатны шүүхийн шийдвэр нууцын зэрэглэлээс 100 хувь гарсан учир танилцах боломжийг олгосон. Давж заалдах болон хяналтын шатны шүүхийн шийдвэрийн зарим хэсгийг нууцаас гарсан эсэх нь эргэлзээтэй байгаа тул Улсын ерөнхий прокурор, Хууль зүйн сайд, Засгийн газартай зөвшилцөж байгаад ОУПХ-ны гишүүдэд танилцуулахаар ажиллаж байна.

Эрүүдэн шүүсэн бичлэгийг үе шаттайгаар олон нийтэд ил болгож байгаа. Уг шийдвэрийг Засгийн газраас гаргасан. Эхний 24 минутын буюу зургаан хоногийн бичлэгээс түүвэрлэж, МҮОНРТ-ээр цацсан. Цаашид цорын ганц амьд гэрч буюу Б.Булганыг эрүүдэн шүүсэн бичлэгийг олон нийтэд үзүүлэхээр бэлдэж байна. Одоогийн байдлаар нийт найман хүн Б.Содномдаржаа, Т.Чимгээ нарыг эрүүдэн шүүсэн гэх хэрэгт холбогдсон найман хүнийг яллагдагчаар татаж, шүүхэд шилжихэд бэлэн болсон” гэлээ.

С.Сүлд