АН-ын зөвлөлийн хурлаар хэлэлцсэн асуудлын талаар тус зөвлөлийн дарга Д.Эрдэнэбат мэдээлэл хийлээ.
Тэрбээр “АН-ын зөвлөл хуралдаж, хоёр үндсэн асуудал хэлэлцсэн. Нэгдүгээрт, Үндсэн хуулийн өөрчлөлтийг энэ сарын 14-нөөс хэлэлцэж эхлэх гэж байна. АН-ын зөвлөл Үндсэн хуульд өөрчөлт оруулах цаг үеийн шаардлага бий гэж дүгнэж байсан. Үндсэн хуулийн өөрчлөхөд гурван гол шаардлага бий гэдгийг эрх баригчдад анхааруулж байсан. Энэ байр суурь хэвээрээ байгаа. Нэгдүгээрт, Үндсэн хуулийг хэлэлцэхэд ард нийтийн саналыг авах зайлшгүй шаардлагатай. Хоёрдугаарт, Үндсэн хуулийг хэлэлцэхийн өмнө Их хурлын нэр хүндийг унагааж байгаа асуудлыг заавал нэг тийш болгох ёстой. Гуравдугаарт, Үндсэн хуулийн хэлэлцүүлгийн явцад бид ажлын хэсэгт тодорхой байр суурь илэрхийлнэ гэж байсан. Энэ байр суурь хэвээрээ бий.
Үнэмлэхүй олонхын саналаар Үндсэн хууль өөрчилж болох уу үгүй юу гэдэг асуудал эргэлзээ дагуулж байна. Бид өмнө нь ард нийтийн санал асуулга явуулна гэж байсан бол өнөөдөр ард нийтээрээ Үндсэн хуулийн өөрчлөлтийг батлах ёстой гэдэг шаардлага тавьж байна. Гэвч энэ Үндсэн хууль сөрөг хүчингүй батлагдах магадлал өндөр байгаа. Ялангуяа Ерөнхийлөгчийн саналыг авсан уу гэдэг нь анхаарал татаж байгаа. Нэгэнт үнэмлэхүй олонхоороо хэлэлцэж байгаа учраас АН хэлэлцүүлэгт оролцоно.
Хоёрдугаарт, өнгөрсөн долоо хоногт Олон улсын парламентын холбооны Хүний эрхийн хорооны төлөөлөл Монгол Улсад ажилласан. Энэ үеэр АН-ын зөвлөл уулзаж, С.Зоригийн амь насыг хохироосон хэрэг болон Г.Батхүү агсны хэргийн асуудлаар санал солилцож, байр сууриа илэрхийлсэн. АН С.Зориг агсны амь насыг хөнөөсөн хэрэг илэрээсэй, зөв шударга шийдэгдээсэй гэдэг байр суурин дээр байсаар ирсэн. Эрх баригчид энэ хэргээр олон удаа шоудсан. Г.Батхүү агсны амиа алдсан хэрэг мөрдөн байцаалтын шатанд явж байна. Дахин нэг нотлогдохгүй хэрэг болчих вий. Урьдчилсан байдлаар талийгаачийн зүрх нь зогсоогүй, тархины цус харвалт болоогүй нь тогтоогдсон. Энэ хоёр хүн хоёулаа ардчиллын төлөө явсан. Тиймээс энэ хэргийн үнэн мөнийг тогтооход АН-аас өөр дуугарах газар байхгүй. Өөр нам ч байхгүй.
О.Баасанхүү гишүүн бидэнтэй албан бусаар уулзахдаа АН-ын зөвлөлтэй хамтарч ажиллая гэж ярьсан нь үнэн. Гэхдээ бидний хувьд О.Баасанхүү хувь гишүүний хувьд УИХ-"ын гишүүнийхээ хувьд хүсэлт тавьж байна уу, эсвэл намаа төлөөлж байна уу гэдэг нь ойлгомжгүй байгаа. Өнөөдрийн байдлаар АН-ын зөвлөлд хүсэлтээ ирүүлээгүй" гэлээ.
Г.Алимаа
Сэтгэгдэл (3)