Жил бүрийн хавар ерөнхий боловсролын сургуулийн засварт зориулж эцэг, эхчүүдээс мөнгө татдаг асуудал гардаг. Тэгвэл БСШУС-ын сайд Ё.Баатарбилэг "Сургууль, цэцэрлэг шинээр барих, урсгал засвар хийхэд зориулан жилд 1.3-1.5 их наяд төгрөгийг төсөвлөдөг. Энэ төсвөөр бүх сургууль, цэцэрлэгийн ангийг засварлах боломжгүй. Тиймээс эцэг, эхчүүд өөрсдийн санаачилгаар анги засварын мөнгө цуглуулдаг. Үүнийг багш нар их хэмжээний мөнгө татаж, өөр зүйлд зарцуулдаг мэтээр зориуд ташаа мэдээлэл түгээж байгаад харамсаж байна" гэж өнөөдөр хэвлэлийн хурал хийх үеэрээ онцоллоо.
Салбарын сайд энэ үеэр ерөнхий боловсролын 42 багш АТГ-т шалгагдаж байгаа тухай мэдээлэлд албан ёсны тайлбар хийсэн юм. Тэрбээр "АТГ-аас 42 багшид хэрэг үүсгэн шалгаж байгаа асуудал огт байхгүй. Харин боловсролын салбараар дамжуулан авлигын эсрэг соён гэгээрүүлэх ажил хийхээр болсон.
Анги засварын мөнгө цуглуулсан нь хүүхдүүдийнхээ анги танхмыг цэвэр тохилог байлгахын тулд эцэг, эхчүүд өөрсдөө санаачлан зохион байгуулсан ажил.
Үүнтэй нь санал зөрөлдсөн зарим эцэг, эх гомдол санал гаргасан юм байна лээ. Иргэдээс ирсэн дээрхтэй холбоотой гомдлыг АТГ судалж үзээд харьяа боловсролын газарт нь шилжүүлдэг" гэв.
Мөн "Боловролын үйл ажиллагааг хэвийн явуулахад иргэн, аж ахуйн нэгжээс хандив авах талаар зүйл заалт нь Боловсролын тухай болон Төсвийн тухай хуульд байдаг. Мөн хэрхэн зарцуулах талаар нь ч дурдсан Боловсролын сайд, Сангийн яамны хамтарсан тушаал 2008 онд гарч байсан. Үүний дээр нэг сая гаруй хүүхэд, залуус суралцаж, 100-гаад мянган багш, ажилтан ажилладаг энэхүү салбарт хүүхдийн эрх харьцангуй хамгаалагдсан, хүчирхийлэлгүй салбар юм" гэдгийг албан ёсоор хэллээ. Харин сургуулиас гарууд гэр бүлийн орчинд хүүхдийн эрх ихээр зөрчигддөг тул эцэг, эхчүүдийн үүргийг өндөржүүлэх, хариуцлагыг нэмэгдүүлэхэд анхаарч ирэх хичээлийн жилд сургууль, эцэг, эхчүүдтэй гэрээ хийхээр болсон гэлээ.
Г.Алимаа
Сэтгэгдэл (2)