Япон Улсын Гадаад хэргийн сайд Коно Тарогийн Монгол Улсад албан ёсны айлчлал хийж, Монгол Улсын Ерөнхийлөгч Х.Баттулга, Ерөнхий сайд У.Хүрэлсүх нарт бараалхаж, улмаар Гадаад Харилцааны сайд Д.Цогтбаатартай хэлэлцээ хийсэн юм. Мөн Япон Улсын Засгийн газрын буцалтгүй тусламжаар баригдсан АШУҮИС-ийн харьяа Монгол-Япон Сургалтын Эмнэлгийн нээлтийн ёслолд оролцсон билээ.
Тэгвэл Япон Улсын Гадаад хэргийн яамны хэвлэлийн төлөөлөгч Мицүко Шино Япон Улсын Гадаад хэргийн сайд Коно Тарогийн айлчлалын зорилго, шийдвэрлэгдсэн гол асуудлуудын талаар дэлгэрэнгүй мэдээлэл өглөө.
Тэрбээр "Коно Таро сайдын албан ёсны айлчлалын хүрээнд дипломат харилцаа, аюулгүй байдлын асуудал голлон яригдсан. Түнчлэн Монголын “агаарын шинэ гарц” болох Улаанбаатар хотын олон улсын нисэх онгоцны шинэ буудлын ажлыг эрчимжүүлэх, эдийн засгийн түншлэлийн хэлэлцээрийг харилцан ашигтай байдлаар явуулахад талуудын санаачилгыг идэвхжүүлэх асуудал яригдсаныг онцолсон юм.
Түүнчлэн "Гурван жилийн өмнө байгуулагдсан эдийн засгийн түншлэлийн хэлэлцээрийн үр дүнгийн талаар нэгдсэн мэдээлэл гараагүй байна. Хэлэлцээр хоёр улсад харилцан ашигтай байх тал дээр Япон улсаас дэмжиж байгаа. Гэхдээ Монголын бараа, бүтээгдэхүүний нийлүүлэлт дорвитой нэмэгдээгүй байна. Хамгийн гол нь тухайн бараа чанартай байх, бүтээгдэхүүний сурталчилгааг зөв хийх, технологио шинэчлэх хэрэгтэй байна. Япон Улс жижиг дунд үйлдвэрлэлийн салбарт гаршсан. Энэ салбарт сүүлийн үеийн дэвшилтэт тоног төхөөрөмж, хамгийн сайн технологийг үйлдвэрлэлд ашиглаж байгаа. Монгол залуус Японд ажиллаад буцаад нутагтаа сайн технологи, өндөр чанартай үйлдвэрлэлийг нутагшуулахад хувь нэмрээ оруулах боломжтой. Эдийн засгийн түншлэлийн хэлэлцээрийг харилцан ашигтай болгох гарц, шийдэл санал болгосон санаачилга бүрийг дэмжин ажиллахад Японы тал бэлэн” гэв.
Японд монголын 3000 иргэн амьдардаг. Ойролцоогоор 10 мянга орчим монгол хүн япон хэл сурч байна. Манай хоёр улс ажилтан солилцох санамж бичгийг өнгөрөгч дөрөвдүгээр сард гарын үсэг зурж баталгаажуулсан. Монгол Улсын хүн амын бүтцийг харвал харьцангуй залуу, хөдөлмөрийн насны иргэд ихтэй. Харин Япон улсын хүн ам жил тутам 500 мянган хүнээр цөөрч байна. Тиймээс 14 салбарт гадаадын есөн орноос ажиллах хүч авахаар болсон. Уг есөн орны жагсаалтад Монгол Улс багтсан. Японы компаниудаас ажиллаж буй салбартаа Монголоос ажиллах хүч авах хүсэлт, санал гаргавал түүнийг нь үндэслэн ажиллах хүч авна. Одоогоор хоёр салбарт Монголоос ажиллах хүч авах санал ирсэн. Уг саналыг үндэслэн иргэдээс япон хэл болон мэргэжлийн ур чадварын шалгалт авч, тэнцсэн иргэдийг Японд ажлын байранд зуучилна. Шалгалтыг аравдугаар сард зохион байгуулахаар бэлтгэж байна. Ажилтан авах саналын тоо шалгалтад тэнцсэн иргэдийн тоотой дүйцэх тохиолдолд улам нарийвчлаад явна” гэлээ.
Г.Алимаа