Францад үргэлжилж буй эмэгтэйчүүдийн хөлбөмбөгийн ДАШТ-ий өнөөдөр болсон Итали-Бразилийн шигшээ багуудын тоглолт 0:1 харьцаагаар Бразил бүсгүйчүүдийн ялалтаар өндөрлөсөн.
Энэ тоглолтын цорын ганц гоолыг Бразилийн шигшээ багийн ахлагч Марта 11 метрийн торгуулийн цохилтоор хийсэн билээ. Энэхүү гоол нь хөлбөмбөгийн ертөнцөд "Юбкатай Пеле" хэмээн алдаршсан Мартагийн ДАШТ-д хийсэн 17 дахь гоол агаад , ийнхүү ДАШТ -д хамгийн олон гоол хийсэн хөлбөмбөгчин боллоо.
Дэлхийн шилдэг эмэгтэй хөлбөмбөгчөөр 6 удаа шалгарч байсан Марта ДАШТ-д тав дахь удаагаа оролцож байгаа юм. Тэрбээр 2007 оны ДАШТ-д мөнгөн медаль хүртэж, ДАШТ-ий "Алтан бөмбөг", " Алтан шаахай" шагналуудын эзэн болж байсан. Мөн Олимпийн наадамд дөрвөн удаа оролцож, хошой мөнгөн медаль хүртэж байв. Энэ жил 33 настай Марта энэ удаагийн ДАШТ-д булчингийн бага зэргийн гэмтэлтэй оролцож буй ч тоглосон хоёр тоглолтондоо хоёуланд нь гоол оруулсан.
Марта Бразилийн шигшээ багт 17 жилийн турш 146 тоглолтод оролцохдоо 112 гоол оруулсан амжилттай. Тэрбээр Францад Бразил бүсгүйчүүдийн хүрч үзээгүй "Дэлхийн аварга" цолыг авах зорилготой ирсэн.
