Монголын Ардчилсан холбооноос УИХ дахь АН-ын Зөвлөлийн гишүүд болох С.Эрдэнэ, Д.Эрдэнэбат, Б.Пүрэвдорж, З.Нарантуяа, Я.Санжмятав, Б.Наранхүү, Д.Мурат нарт хандан уриалга гаргажээ. Агуулга нь УИХ дахь АН-ын Зөвлөлийн долоон гишүүнийг бүрэн эрхээсээ татгалзах тухай. Нэг үгээр, УИХ-ыг тарах асуудлыг хөндөх болсон Ерөнхийлөгчийн саналыг МоАХ-наас дэмжиж байгаа бололтой.
Тодруулбал, “Үндсэн хуулийн нэгдүгээр зүйлийн хоёр дахь хэсэгт баталгаажсан ардчилсан шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх зарчмыг УИХ-ын үе үеийн гишүүд хөсөрдүүлсээр улсаа сүйрэлд оруулжээ.
Үндсэн хуулийн 25 дугаар зүйл, УИХ-ын тухай хуулиар олгогдсон гишүүний бүрэн эрх гэдэг бол мөн чанараараа халдашгүй эрх ямба, хангамж биш харин ард түмний өндөр дээд итгэл найдвар билээ.
Гэтэл өнөөгийн УИХ бүхэлдээ ард түмний итгэл алдсан, ёс зүйгүй, чадамжгүй ашиг сонирхлын бүлэглэлүүдийн бөөгнөрөл болжээ. Алдаатай бодлогоосоо үүдэн АН хуулиар заагдаагүй “зөвлөл” гэх арга ядсан статус ашиглаж буй нь Бүлгийн хэмжээнд сөрөг хүчний үүрэг гүйцэтгэх чадамжаа нэгэнт алдсан гэж дүгнэхээс аргагүй бөгөөд УИХ-ыг тарахыг шаардсан Ерөнхийлөгчийн удаа дараагийн шаардлагыг Та бүхэн дэмжиж, АН-ын жирийн гишүүд, үнэнийг эрэлхийлсэн ард түмэнтэйгээ нэгдэхийн чухлыг энэ ташрамд тэмдэглэж байна.
Бид үндэсний эрх ашгаа нэн тэргүүнд эрхэмлэн, шударга ёсны зарчмыг баримтлан, АН-ын дүрмийн 1.2 заалт /АН нь Монгол оронд үндэсний тусгаар тогтнол, бүрэн эрхт байдал, эрх чөлөө, олон ургалч үзэл, ардчилал, хүний эрх, зах зээл, хувийн өмч, чөлөөт хэвлэл, олон намын тогтолцоо ардчилсан сонгууль, эрх зүйт төрийг бий болгохын төлөө өрнөсөн 1990 оны цагаан морин жилийн ардчилсан хувьсгалыг санаачлан эхлүүлж, манлайлан удирдсан МоАХ, АСХ, ШДХ, МОХ зэрэг улс төрийн хүчнүүдээс төрөн гарсан намуудын нэгдэл болсон ууган ардчилсан улс төрийн хүчин мөн/-ийг сануулан, УИХ-ын гишүүний бүрэн эрхээсээ албан ёсоор татгалзахыг уриалж Та бүхэнд уриалж байна” гэжээ.
С.Сүлд
Сэтгэгдэл (3)