"Терроризмд турхирч буй хүчирхийлэл дагуулсан экстремизм, радикалчлалаас урьдчилан сэргийлэх, тэмцэхэд нийгмийг хандуулах" сэдэвт дээд хэмжээний бүс нутгийн бага хурал энэ сарын 20-21 хооронд манай улсад зохиогдож байна. Уг хуралд Унгар улсын Гадаад хэргийн сайд П.Сияярто манай улсад айлчлалын хүрээнд оролцсон юм. Энэ үеэр Гадаад харилцааны сайд Д.Цогтбаатар нар өргөтгөсөн уулзалт хийсэн юм.

Тэрбээр уулзалтын үр дүнгийн талаар “Унгар Улсын  Гадаад хэргийн сайд П.Сияярто манай улс дахь дөрөв дэх удаагаа албан айлчлал хийж байна. Манай хоёр орны харилцаж ирсэн түүхэнд маш олон бүтээн байгуулалт, эдийн засгийн томоохон харилцаа байсны нэг нь Биокомбинат. Унгар улс зээл өгч, технологийг нь шинэчилж бүтээгдэхүүнийг нь илүү сайжруулахад анхаарч ажиллаж байгаа. Нийтдээ 57 сая ам.долларын зээлийн асуудал байгаа. Монгол талдаа захиргааны шинж чанартай шийдвэрээ гүйцээж гаргах ёстой.

Уулзалтын үеэр хоёр том зах зээл рүү чиглэсэн экспортын үйл ажиллагааг хамтарч, дэмжих талаар ярилцсан. Ялангуяа хүнс, хөдөө аж ахуйн салбарт хамтын ажиллагааны маш том орон зай бий. Унгар Улс Европын холбооны гишүүн орон. Хүнс боловсруулах, хөдөө аж ахуйн технологи боловсруулах бэлдэц маш өндөр хөгжсөн. Энэ чиглэлийн хөрөнгө оруулалтаа Монголд хийвэл ажлын байр бий болж, экспортын бараа төрөлжиж, гадаад валютын урсгал нэмэгдэж, уул уурхайн хараат байдлаас гарахад нэн чухал үүрэгтэй.

Бизнесийн форум хийх санал тавьсан. Усны чиглэлийн хамтын ажиллагаа үргэлжлэх бүрэн боломжтой. Соёл, боловсрол, урлагийн чиглэлээр хамтын ажиллагаа өрнүүлэхийг хүсч байгаа. Унгарт Европын улсаас манай оюутнууд хамгийн олон буюу 200 залуус суралцдаг.

Европын Аюулгүй байдал, Хамтын ажиллагааны байгууллага бол хууль бус наймааны эсрэг хамгийн үр дүнтэй үйл ажиллагаа явуулдаг олон улсын байгууллага. Энэ байгууллагатай хамтарсан дээд хэмжээний бүс нутгийн бага хурлын үеэр “Жижиг орны ард иргэдийг хил дамнасан хууль бус наймаанд татаж, оруулах зохион байгуулалттай гэмт хэргийн бүлэглэлүүд үйл ажиллагаа явуулж байна. Үүнтэй дангаараа тэмцэж чадахгүй байна. Манай иргэдийг татаж оролцуулж байгаа энэ бүлэглэлүүдийг гишгэх газаргүй болгоход Европын байгууллагууд хамтарч ажиллах хэрэгтэй байна. Бид иргэдээ ийм аюулаас урьдчилсан сэргийлмээр байна. Дэмжлэг үзүүлээч” гэсэн хүсэлтийг тавьсан. Унгар Улстай энэ асуудлаар хамтарч Монгол иргэдийг хил дамнасан гэмт хэрэгт өртүүлэхгүй байх тал дээр хамтарч ажиллаж гэдэгт итгэж байна” гэв.