Өнгөрсөн амралтын өдөр Монгол бөхийн өргөөнд зохиогдсон бөхийн барилдаан болон бусад асуудлаар МҮБХ-ноос мэдээлэл хийлээ.

Энэ талаар МҮБХ-ны дэд захирал, Улсын заан Ц.Магалжав “МҮБХ 1990 оноос үйл ажиллагаагаа явуулж байгаа хамгийн том байгууллага. Өнгөрсөн оноос бүтэц, зохион байгуулалт өөрчлөгдөж, бидний үеийн залуучууд ажиллаж байна. Гэвч энэ үетэй давхцан улсын бүртгэлийн гэрчилгээ, тамга тэмдэг нь “Гацуурт”-ын Л.Чинбатын нэр дээр гарсан. Уг асуудал өнөөдөр Захиргааны хэргийн шүүхэд хэрэг үүсгэгдэн шүүхийн шатанд шилжсэн.

Энэ хугацаанд улсын чанартай барилдааныг зохион байгуулах гэж улсын цолтой, сумын цолтой, аймгийн цолтой бөхчүүдийн 20 гаруй барилдааныг зохион байгууллаа. Ингэхдээ Бөхийн өргөө хаагдсан учир “Буянт-Ухаа” спорт ордонд зохион байгуулсан. Бөхчүүдийн олонх нь барилдааны бай шагналаар амьдардаг. Энэ утгаараа олон залуусын эрх ашиг хөнддөг учир 21 брилдааныг зохион байгуулж, улмаар энэ оны нэгдүгээр сараас үйл ажиллагаа жигдэлсэн.

МҮБХ болон бусад холбоодууд допинг хэрэглэх асуудалтай хатуу тэмцэж байна. Тухайлбал, 2017 онд “Допингийн эсрэг олон улсын конвенци”-д Монгол Улс нэгдсэн. Спортод богино хугацаанд амжилт гаргах, үүнийг дагаад олон давуу тал бий болдог тул амжилтад яарах асуудал цөөнгүй бий. Үүнд хүрэхийн тулд зарим тамирчид допинг хэрэглэх тохиолдол гарч байна. Тиймээс үүнтэй хатуу тэмцэнэ. Тэмцэх ч ёстой.

Энэ хүрээнд өнгөрсөн 2017 онд БСШУСЯ, Биеийн тамир спортын газар, Допингийн эсрэг төв хамтарч “Допингийн эсрэг үндэсний хяналт-I” төсөл хэрэгжүүлсэн. Төслийн хүрээнд 198 тамирчнаас шинжилгээ авсан.

Манай холбоо хоёр толгойтой юм шиг байдалд хүрээд байна. Тиймээс Баянзүрх дүүргийн Иргэний хэргийн анхан шатны шүүхэд хандсан. Өнгөрсөн оны тавдугаар сарын 6-ны өдөр шүүхийн захирамж гарсан. Шүүхийн захирамжаар асуудалтай зүйл гарсан. Учир нь зохиолч Ү.Хүрэлбаатар хариуцагчаар оролцохдоо тухайн бөхчүүдтэй эвлэрлийн гэрээ хийх захирамж гаргуулсан. Өөрөөр хэлбэл, шүүхээс тухайн бөхчүүдийг барилдуулах буруу шийдвэр гарсан юм.

Ү.Хүрэлбаатар будлиантай асуудал үүсгэснээс үүдэн нийслэлийн Шүүхийн шийдвэр гүйцэтгэх байгууллагаас энэ оны тавдугаар сарын 9-ний өдөр албадан барилдуулах шийдвэрийг МҮБХ-нд гаргаж өгсөн. Дараа нь тавдугаар сарын 14-ний өдөр Монголын үндэсний бөхийн холбооны дэд тэргүүн нарт холбоотой хэрэг нээсэн.

Энэ сарын 10-ны өдөр БСШУС-ын сайд Ё.Баатарбилэг допинг илэрсэн бөхчүүдийн асуудлыг Баянзүрх дүүргийн Иргэний хэргийн анхан шатны шүүх хүчингүй болгосон. Тиймээс тайлбар авахаар Улсын Дээд шүүхийн Ерөнхий шүүгч Г.Батсүрэнд албан бичиг хүргүүлсэн.

Ингээд МҮБХ-ны Тэргүүлэгчдийн хуралд оролцсон 15 гишүүний найм нь допинг хэрэглэсэн асуудалд холбогдсон бөхчүүдэд уучлал үзүүлэх шийдвэр гаргасан. Би үүний эсрэг байр суурьтай байна” гэв.

Б.Лхам