Цахим сүлжээгээр Тост, тосон бумбын нурууны сав газрын амьтад дайжиж, улмаар хоёр ирвэс үхсэн талаарх мэдээлэл цацагдсан билээ. 

Энэ талаар “Ирвэс хамгаалах сан”-гийн  мэргэжилтнээс тодруулахад “Хоёр ирвэс үхсэн мэдээлэл ирээгүй. Хэрэв ийм зүйл болсон бол тухайн аймгийн Байгаль орчны газраас мэдэгдэх ёстой. Иргэд болон зарим хэвлэл мэдээллийн хэрэгслээр уг асуудлыг холбогдох эх сурвалжаас нягтлаагүй, ор үндэслэлгүй мэдээлэл цацаж байна.

Манай сан нь Тост, тосон бумбын нуруунд судалгаа хийж, ирвэс хамгаалах ажлыг 11 жилийн хугацаанд хийж байна. Энэ хугацаанд идэш тэжээл, байгаль цаг уурын нөхцөлөөс шалтгаалж, хоргодох асуудал ганц нэг гарсан. Гэхдээ дээр дурдсан шиг хоёр ирвэс үхсэн байдалтай олдсон асуудал байхгүй.

Тухайн газар нутагт үйл ажиллагаа явуулж эхэлснээс хойш авч үзэхэд ирвэсийн тоо толгой тогтмол байгаа нь судалгаагаар гарсан. Ирвэс нь цөөн тооны зулзага гаргадаг. Ингэхдээ хоёр жилд нэг удаа зулзгалдаг юм. Өөрөөр хэлбэл, ирвэсийн идэш тэжээл, тоо толгойн өсөлт тогтвортой байгаа гэж үзэж болно” гэв.

Харин Өмнөговь аймгийн Байгаль хамгаалагч Ч.Энхтуяа eguur.mn сайтад “Бидэнд ямар ч үхсэн ирвэсний талаар мэдээлэл ирээгүй. Амьтад дайжсан юм байхгүй. Аргал янгир нь уулаараа, тал нутгаараа өмнө нь байсан цөөн хэдэн амьтад байсан хэвээрээ бий. Ер нь сүүлийн жил гаруй хугацаанд үхсэн амьтны талаар мэдээлэл ирээгүй” гэсэн тайлбарыг өгсөн байна.

Б.Лхам