Тагнуулын дарга асан, хошууч генерал Б.Хурц нарт холбогдох шүүх хурал 15 минут завсарлаад үргэлжилж байна. Энэ үеэр шүүгдэгчийн өмгөөлөгч Б.Мэргэн “Шүүх хуралдааныг нээлттэй явуулах боломжгүй. Угаасаа нууцын зэрэглэлтэй хэрэг. Тиймээс үүнийг шүүх шийдэхгүй. Засгийн газрын 115 дугаар тогтоолоор нэгээхэн хэсгийн тасдаж аваад олон нийтэд ил болгосон. Бусад 30 гаруй хавтаст хэрэг нууц хэвээрээ байгаа. Энэ хэргийн нууцыг ил болгох асуудлыг Тагнуулын ерөнхий газрын саналаар Засгийн газар шийдвэрлэх ёстой. Түүнээс биш шүүхийн байгууллага шийдэхгүй. Шүүхээс хамаарч энэ хэргийг хаалттай хэлэлцсэн юм биш” гэсэн тайлбарыг өгсөн.
Энэ удаагийн шүүх хуралд Б.Содномдаржаа оролцож байгаатай холбогдуулж түүний ээж Л.Жавзмаа ирээд буй. Тэрбээр “Жирийн иргэнийг 100 хувь хэлмэгдүүлж, өчнөөн зодуур, нүдүүрийн арга хэрэглэлээ. Б.Хурц яахаараа ингэж зүтгээд байдаг хүн бэ. Т.Чимгээ, Б.Содномдаржаа хоёрыг л түргэн суллахгүй бол одоо бие нь улам муудаж байна. Одоо дөрвөн жил боллоо шүү дээ. Сар болоод нэг удаа хүүтэйгээ уулздаг юм. Сүүлд 20-иод хоногийн өмнө хүүтэйгээ уулзсан. Хүүгийн минь биеийн байдал яах вэ. Саяхан эмнэлэгт хэвтүүлсэн учраас гайгүй байна. Гэхдээ сэтгэл санааны асуудал маш хүнд байна. Би өнөөдрийн шүүх хурлыг үнэн зөв шийдэх байх гэж бодож байна” гэсэн юм.
Харин шүүх хуралдаанд хохирогчоор оролцож байгаа Б.Булган “Миний хувьд хамаагүй юм ярьж болохгүй. Гэхдээ шүүх хурал нэгэнт эхэлсэн болохоор шийдвэрээ гаргах ёстой. Үүнийг хүн бүр харж хүлээж байгаа. Дахин хойшилно гэсэн асуудал үүсэхгүй байх гэж бодож байна. Тодорхой мэдээллийг миний өмгөөлөгчөөс ав” гэлээ.
С.Сүлд
Сэтгэгдэл (15)