ЕТГ-ын дарга З.Энхболд АН-ын даргын ахлах зөвлөхөөр ажиллах болсон нь өнгөрсөн долоо хоногийн “сенсаци” байлаа.
Хальт харвал тэр намдаа очиж, удахгүй болох УИХ-ын сонгуульд оролцох бэлтгэлээ хангахаар болжээ. Гэхдээ өнөө цагийн “адармаатай улстөрч”-өөр нэрлэгдсэн З.Энхболдын энэ нүүдлийн ард юу явна вэ гэдгийг улс төрийн ажиглагч, шинжээчид анхааралтай харж байгаа бололтой юм. З.Энхболдын ганц нэг төлөвлөгөө, санааны талаар ярихад эхэлж байна. Тэр нь юу юм бэ гэхээр АН-ын даргын ахлах зөвлөх З.Энхболд АН-ын даргыг солихоор зэхэж байгаа гэнэ.
Өөрөөр хэлбэл, АН-д тун удахгүй удирдлагын реформ хийгдэж, С.Эрдэнийн суудал ганхаж эхлэх нь. Ганхах ч гэж, С.Эрдэнэ АН-ын даргын албан тушаалаас мултарч магадгүй гэж байна.
С.Эрдэнийн оронд Завханаас УИХ-д сонгогдсон З.Нарантуяаг зүтгүүлэхээр болжээ. З.Нарантуяаг З.Энхболд “түрж” байгаагаас гадна АН-ын идэвхтэй залуусын нэлээд нь дэмжихээ илэрхийлжээ.
Одоогоос З.Нарантуяагийн АН-ын дарга болох кампанит ажлын бэлтгэл бүрэн хангагдаж, бодитоор хэрэгжихдээ тулсан байна.
Олон үе шаттай хийгдэх энэ кампанит ажлын үр дүн дөрөвдүгээр сард гарах гэнэ. Тэр үед АН-ын Их хурал хуралдаж, С.Эрдэнийг З.Нарантуяагаар солих шийдвэрийг гаргах юм байна.
Хэрвээ З.Энхболдын удирдсан энэ ажиллагаа үр дүнд хүрвэл З.Нарантуяа ингэж АН-ын дарга болно гэсэн үг.
Гэхдээ З.Нарантуяа аль ч утгаараа олон “ханлиг” бүхий АН-ыг удирдах боломжгүй. Маш хүнд. Сонгуультай жилийн намыг намыг толгойлох хэн бүхний хийж чадах ажил биш. Үүнийг хэн бүхэн, ялангуяа АН-ынхан маш сайн мэдэж байгаа.
Харин цаад үнэнийг нь мэдвэл байдал өөр. Цаад үнэн гэдэг нь З.Нарантуяа АН-ын дарга болно гээг бол З.Энхболд АН-ыг удирдана гэсэн үг.
Учир нь З.Нарантуяа бол З.Энхболдын хүн, үгнээс нь гарахгүй.
З.Энхболд 2012 оны долдугаар сард УИХ-ын дарга болоод “Парита энд Партнерс” компанийн ерөнхий захирлаар ажиллаж байсан З.Нарантуяаг УИХ-ын даргын Эдийн засгийн бодлогын зөвлөхөөр томилсон. З.Нарантуяа энэ албан тушаалд хоёр жил ажилласан. Улмаар 2013 оноос Завхан аймгийн АН-ын хорооны дарга болж нэг жил болсон.
З.Энхболдыг 2014 оны арваннэгдүгээр сард АН-ын дарга болсны дараа З.Нарантуяа Санхүүгийн зохицуулах хорооны даргаар томилогдсон.
Ингээд 2016 оны УИХ-ын сонгуульд УИХ-ын дарга, АН-ын дарга З.Энхболдын шийдвэрээр З.Нарантуяа төрөлх Завхан аймагтаа УИХ-ын сонгуульд нэр дэвшиж сонгогдсон байдаг. З.Энхболд, З.Нарантуяа хоёрыг холбодог өөр бусад сэжмүүд ч бий.
Ямар ч байсан удахгүй З.Нарантуяа АН-ын даргын суудал руу зүтгэнэ. Түүний ар дахь “асаалттай танк” нь АН-ын даргын ахлах зөвлөхийн ажилтай З.Энхболд юм.
Дахин хэлэхэд З.Нарантуяа АН-ын дарга болох юм бол З.Энхболдын гарт АН орно л гэсэн үг ажээ.
С.Сүлд
Сэтгэгдэл (70)