УОК-ын гаргасан шийдвэрийн дагуу Зам тээвэр, хөгжлийн сайд Б.Энх-Амгалангаас зарим зүйлийг тодрууллаа.
-УОК-оос онгоцны тийз буцаахад ямар нэгэн суутгал авахгүй байх шийдвэр гарсан. Гэтэл "Хүннү эйр" компани тодорхой хувь суутгаж авсан талаарх мэдээлэл бий. Энэ асуудлыг хэрхэн шийдвэрлэх вэ?
-УБТЗ-аас бүх билетээ ямар ч суутгалгүйгээр буцаасан гэсэн шийдвэр ирсэн. Харин "Хүннү эйр" компанийн билет борлуулдаг салбар нэгжүүд суутгал авсан гэдэг зүйл яригдсан. Энэ асуудлаар холбогдох албан тушаалтнуудтай ярина.
-Дарханы зам ирэх зургадугаар сард амжиж ашиглалтад орох болов уу?
-Гэрээний хугацаа нь зургадугаар сар юм. Өнгөрсөн оны арванхоёрдугаар сард уулзаж гэрээгээ дүгнэсэн. Дээрээс нь төлөвлөгөөгөө ч гаргасан. Ингэхдээ зөвхөн гүйцэтгэгч компани биш туслан гүйцэтгэгч компани хяналтын үүрэг гүйцэтгэж байгаа төслийн нэгжүүдтэйгээ нийлж байгаад өдөр өдрийнхөө төлөвлөгөөг гаргасан. Энэ талаар өнөөдөр ярилцсан. Онцгой нөхцөл байдал үүсээгүй учир ажлаа хий гэдэг шаардлага тавьж байгаа. Хэрэв 2, 4-ын гэрээ цуцлагдвал 1, 3, 5 дээр ажиллаж байгаа компанид эрхийг шилжүүлэх асуудал яригдсан.
-Танай яамны хариуцаж байгаа ажил. Хэрэв товлосон хугацаандаа дахиад багтаж чадахгүй бол та хариуцлага хүлээх үү?
-Энэ ажлыг төлөвлөгөөнийхөө дагуу гүйцэтгэхээр ажиллаж байна. Зургадугаар сардаа багтааж ашиглалтад оруулахыг хичээнэ.
-Азийн хөгжлийн банкнаас хэдэн хувийн санхүүжилт ирсэн бэ?
-Эхний санхүүжилт л ирсэн. Хоёр, гурав дахь санхүүжилт удахгүй орж ирэх ёстой. 2, 4 дүгээр компанийн хувьд эхний ээлжийн санхүүжилтээ авсан.
-Таныг ЖДҮХС-гаас зээл авсан талаар ярьж байна?
-Хэрэв би ЖДҮ-гээс зээл авсан бол сайд болохгүй байсан юм. Надтай ямар ч холбоогүй, захирлыг нь ч танихгүй компанитай намайг холбосон байна лээ. Хүнийг гэмт хэрэгт гүтгэж байгаа учраас ийм мэдээлэл тараасан хүнийг шалгуулна.
А.Сүх
Сэтгэгдэл (1)