Салхитын мөнгөний ордын хэргээр гавьяат хуульч Л.Б-ааг Цагдан хорих 461 дүгээр ангид цагдан хорьж, шалгаж эхэлсэн ч тэрбээр амиа хорлосон юм. Цагдан хорих төвд гарсан уг хэргийн мөрөөр ШШГЕГ-ын харьяа 461 дүгээр ангийн удирдлага, харуулын албаны дарга зэрэг албан тушаалтнуудыг үүрэгт ажлаас нь чөлөөлж, хэргийг цагдаагийн байгууллага шалгаж эхэлсэн. Тэгвэл уг хэрэгт холбогдох шүүх хурал ирэх гуравдугаар сарын 3-нд Баянгол дүүргийн Эрүүгийн хэргийн анхан шатны шүүхэд товлогдсон байна. 

Тодруулбал, Баянгол дүүргийн прокурорын газраас Г.Сүхболд нарын дөрвөн хүнд холбогдох Эрүүгийн хуулийн тусгай ангийн 23.5 дугаар зүйлийн 2 дахь хэсэг /хууль сахиулагч яаралтай тусламж үйлчилгээ үзүүлэх үүргээ биелүүлээгүй хайнга хандах/-т заасан хэргийн шүүх хуралдаан ирэх сарын 3-ны өдрийн 09.00 цагт товлогджээ.