МИАТ-ийн захирлын зөвлөл хуралдаж, Коммер эрхэлсэн дэд захирал Ш.Гантулгыг үүрэгт ажлаас нь чөлөөлжээ. Учир нь, Ш.Гантулга албан тушаалаа ашиглан МАН-ын нарийн бичгийн дарга Ц.Бат-Энхэд байгууллагын болон холбогдох дүрэм зөрчин, бизнес ангиллын суудал гаргаж өгсөн гэж үзжээ. Мөн Япон улс дахь МИАТ-ийн төлөөлөгчдөд хууль бус үүрэг даалгавар өгсөн гэх үндэслэлээр Улсын онцгой комиссоос өгсөн үүргийн дагуу ажлаас нь чөлөөлсөн байна.
Эх сурвалжийн хэлж буйгаар Засгийн газрын тогтоол, Улсын онцгой комиссын шийдвэрийн хүрээнд Улаанбаатар-Сөүл чиглэлийн нислэгийг хаасан үед БНСУ-аас Япон улс руу нислэг хийж, дамжин ирсэн 30 гаруй зорчигчийг онгоцны хойд талын суудалд суулгажээ. Гэвч МАН-ын Нарийн бичгийн дарга Ц.Бат-Энх МИАТ-ийн Коммер эрхэлсэн дэд захирал Ш.Гантулга руу холбогдож, бизнес ангиллыг суудал гаргуулжээ.
Хөл хорио тогтоосон хугацаа хүртэлх уг агаарын замын сүүлийн нислэгийг Токио-Улаанбаатар чиглэлд өчигдөр хүлээн авах байсан ч цаг агаарын улмаас нислэг хойшлогдсон байдаг. Улмаар Токио-Улаанбаатар чиглэлийн ОМ502 хуваарьт нислэгийн онгоц өчигдөр 18.30 цагт Улаанбаатарт газардсан юм. ОМ502 хуваарьт нислэгээр 260 зорчигч Улаанбаатарт ирснээс 223 нь Монгол Улсын иргэн байжээ. Зорчигчдын 38 нь Сөүл-Токио-Улаанбаатар маршрутаар ирсэн бөгөөд эдгээр иргэнийг Улсын онцгой комиссын шийдвэрийн дагуу ХӨСҮТ-д тусгаарлахаар болсон ч Ц.Бат-Энх эсэргүүцэл үзүүлсэн байдаг.
Үүнтэй холбогдуулж МАН-ын дарга, Ерөнхий сайд У.Хүрэлсүх онцгой комиссоос гаргасан шийдвэрийг зөрчиж ёс бус үйлдэл гаргасан түүнийг хүчээр тусгаарлах чиглэл өгснөөр МАН-ын Ерөнхий нарийн бичгийн дарга Д.Амарбаясгалан ажлаас нь чөлөөлөх шийдвэр гаргасан тухай мэдээлэл байгаа юм.
Ц.Бат-Энх нь “Эрдэнэт” үйлдвэрийн Хүний хөгжлийн асуудал хариуцсан захирлаар ажиллаж байгаад 2016 онд МАН-ын нарийн бичгийн даргаар сонгогдсон юм. Мөн 2017 оны арваннэгдүгээр сард хуралдсан МАН-ын XXVIII ээлжит хурлаас нарийн бичгийн даргаар дахин сонгогдон ажиллаж байсан нэгэн.
С.Сүлд
Сэтгэгдэл (133)