Шинэ төрлийн коронавирусний халдварын тархалтын талаар албаны хүмүүс мэдээлэл хийлээ.

О.Ариунтуяа “ДЭМБ-аас гаргасан сүүлийн үеийн тоогоор COVID-19 халдварын 83694 тохиолдол батлагдаж, 2861 нас баралт бүртгэгдсэн. Дэлхийн нийт 55 улсад халдвар бүртгэгдээд байна. Сүүлийн 24 цагийн байдлаар Шинэ Зеланд, Беларусь, Нидерланд, Азейрбайжан зэрэг улсуудад халдвар бүртгэгдсэн. Мөн Хятад улсад 320 гаруй шинэ тохиолдол шинээр бүртгэгдсэн бөгөөд 21 аймагт дэгдэлт байдлаар эрчимтэй тархаж байна. Ялангуяа Солонгос улсад 71 тохиолдол нэмэгдэж, 2107 тохиолдол болсон. Италид 560 тохиолдол бүртгэдсэн бол Иранд 104 тохиолдол, дөрвөн нас баралт нэмэгдсэн”. 

МХЕГ-ын улсын ахлах байцаагч Т.Төмөрбаатар “Сүүлийн гурван өдөр гэхэд мэргэжлийн хяналтын байцаагчид 219 сэжигтэй тохиолдлыг илрүүлж, ХӨСҮТ болон холбогдох эмнэлгийн байгууллагуудад шилжүүлж ажиллалаа. Иргэдийн хувьд голомт гарсан бүс нутгийг мэдсээр байж зорчиж байгаа тохиолдол их байна. Тухайлбал, энэ сарын 27-ны өдөр Нурь-Султан-Улаанбаатар чиглэлийн онгоцоор ирсэн зорчигч Солонгос улс руу зорчиж, Сөүлийн хоёр, гурван эмнэлгээр дамжин туршлага судална гэж явсан байна.

Мөн Тайланд улс руу аялалаар явсан тохиолдол хүртэл бий. Эдгээрийг харахад иргэдэд сануулсаар байхад голомттой бүс рүү зорчиж байгаа нь эрсдэл бий болгож байна. Тиймээс голомттой бүс рүү зорчихгүй байхаас гадна алба хаагчдын ажлыг хүндэтгэх, чирэгдэл учруулахгүй байгаасай гэж хүсч байна” гэлээ.

А.Сүх