Дундговь аймгийн Гурвансайхан сумын нутаг дэвсгэрт байх Салхитын мөнгөний ордтой холбоотой асуудлаар нэр бүхий шүүгч нарт холбогдох хэргийн шүүх хурлын тов гарсан ч шүүгчдэгч шүүгчээс татгалзсан учир шүүх хурал хойшлоод буй. Тэгвэл уг хэргийн холбогдогчоор ГИХГ-ын дэд дарга асан Б.Цолмон, Хан-Уул дүүргийн цагдаагийн хэлтсийн тасгийн дарга Г.Алтан-Очир, ШШҮХ-гийн Криминалистикийн шинжилгээний газрын дарга, дэд хурандаа Д.Адилбаяр нарыг яллагдагчаар татаж, хэргийг шүүхэд шилжүүлсэн. Хэргийн шүүх хурал өнгөрсөн нэгдүгээр сарын 28-нд Хан-Уул дүүргийн Эрүүгийн хэргийн анхан шатны шүүхэд болохоор товлогдсон ч шүүгдэгч Б.Цолмонгийн өмгөөлөгч Г.Должинсүрэн нь эрүүл мэндийн шалтгаанаар ирэх боломжгүй болсон учир шүүх хуралдааныг өнгөрсөн хоёрдугаар сарын 17-ны өдөр хүртэл хойшлуулсан юм. Гэвч шүүх хурал дахин хойшилж, өнөөдөр 16.00 цагаас болох гэж байна.

Нийслэлийн Прокурорын газраас ШШҮХ-гийн Криминалистикийн шинжилгээний газрын дарга асан, дэд хурандаа Д.Адилбаяр, ГИХГ-ын дэд дарга асан Б.Цолмон нарт Эрүүгийн хуулийн 22.4.4, 22.5.1-д зааснаар яллах дүгнэлт үйлдсэн юм.

Эрүүгийн хуулийн 22.4 дүгээр зүйл буюу хахууль авах, нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлээгүйн хариуд, эсхүл хэрэгжүүлэхгүй байхын тулд, эсхүл гүйцэтгэх ёсгүй үйлдлийг хийсэн, эсхүл хийхийн тулд шууд, эсхүл бусдаар дамжуулан хахууль өгөхийг шаардсан, авсан бол нийтийн албанд томилогдох эрхийг 2-5 хүртэл жилийн хугацаагаар хасаж,  10 мянган нэгжээс 40 мянган нэгжтэй тэнцэх хэмжээний төгрөгөөр торгох, эсхүл 2-8 найман жил хүртэл хугацаагаар хорих ял шийтгэнэ.

Мөн хуулийн 22.5 дугаар зүйл буюу хахууль өгөх, өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн, эдийн бус баялаг, тэдгээрийг өмчлөх эрхийг шилжүүлсэн, төлбөргүй, эсхүл хөнгөлөлттэй үйлчилгээ үзүүлсэн, эсхүл эдгээрийг амласан, санал болгосон бол нийтийн албанд томилогдох эрхийг 2-5 жил хүртэл хугацаагаар хасаж 2700 нэгжээс 14 мянган нэгжтэй тэнцэх хэмжээний төгрөгөөр торгох, эсхүл зургаан сараас 3 жил хүртэл хугацаагаар зорчих эрхийг хязгаарлах, эсхүл зургаан сараас 3 жил хүртэл хугацаагаар хорих ял шийтгэнэ гэх зүйл ангиар шүүж байгаа юм.

Г.Маргад