Коронавирусний сэжигтэй тохиолдлын улмаас тусгаарлагдсан иргэд тусгаарлах байр, хоол ундыг голж, усанд орох шүршүүр шаардсан тухай мэдээлэл цацагдсан билээ. Тэгвэл улсын эмнэлэгт хэвтэн эмчлүүлж байгаа зарим өвчтөн болон сахиурууд эмнэлгийн хоолны хэмжээ бага, амтгүй байна гэж голох болсон байна.
Учир юу гэвээс, коронавирусний тархалтаас сэргийлэх үүднээс олон нийтийг хамарсан арга хэмжээ болон үйлчилгээний ямар ч хэлбэрийн газруудаар үйлчлүүлэхгүй байхыг анхааруулж буй. Энэ хүрээнд энэ сарын 13-нийг хүртэл товлогдоод байсан зарим шүүх хурлыг хойшлуулах зөвлөмжийг Шүүхийн ерөнхий зөвлөлөөс гаргасан бол эмнэлгийн байгууллагын хувьд II, III шатлалын эмнэлгүүд яаралтай мэс заслаас бусад төрлийн мэс заслын хуваарийг хойшлуулсан байна.
Энэ сарын 12-ны өдрийн байдлаар П.Н.Шастины нэрэмжит Улсын гуравдугаар төв эмнэлэг болон Улсын нэгдүгээр төв эмнэлгээр үйлчлүүлэх иргэдийн тоо багассан ч эргэлтээр ирэх иргэдийн хөл хөдөлгөөн тасрахгүй байгаа нь харагдлаа. Уг нь коронавирусний тархалтаас сэргийлэх үүднээс өвчтөний эргэлтийг хязгаарлаж, гаднаас хоол, хүнс оруулахгүй байх зохицуулалтыг эмнэлгүүд даган мөрдөж байгаа.
Тухайлбал, УНТЭ-ийн хувьд энэ сарын 10-наас хойш эргэлт оруулахгүй байгаа бол П.Н.Шастины нэрэмжит Гуравдугаар төв эмнэлэг өдөрт 07.00-09.30, 18.00-20.00 цагийн хооронд эргэлт оруулж байна.
Эргэлт оруулахгүй байгаа эмнэлгийн хувьд хэвтэн эмчлүүлэгч болон хүнд өвчтний сахиурын хоол, ундыг эмнэлгийн цайны газарт бэлтгэн өгч буй юм.
Гэтэл зарим иргэд үүнийг нь голж, "Гэрээсээ хоол авмаар байна" гэж ундууцсан бол эргэлтээр ирэх хүмүүс ч гэсэн ийм хандлага ихээр гаргах болжээ. Ялангуяа өдрийн цагаар ийм асуудал гаргах хүмүүс цөөнгүй болсон нь харагдсан юм.
Энэ талаар Улсын нэгдүгээр төв эмнэлгийн ажилчид “Хэвтэн эмчлүүлэгчдэд хоолны хэмжээг өмнөх үеийнхээс бага ч гэсэн нэмсэн. Гэвч иргэд “Амтгүй байна, бага байна” гэдэг зүйл ярьж байна. Улмаар “Гэрийнхээ хоолыг идэхгүй бол хоолшихгүй байна” гэдэг асуудлыг тавьж байна. Улсын хэмжээнд онц байдал зарласан. Хэрвээ эргэлтийг өмнөх шигээ цагийн зохицуулалтгүй байлгавал халдварын эрсдэлээс урьдчилан сэргийлэх боломжгүй болно. Манай эмнэлэгт хүнд болон хөнгөн гээд төрөл бүрийн оноштой хүмүүс хэвтэж байна. Гэтэл биеийн байдал нь хүнд байгаа нэгнийгээ зарим нь бодолцохгүй юм” гэлээ.
Тус эмнэлэгт энэ сарын 12-ны өдрийн 16.00 цагийн орчимд үед яг ийм асуудал тавьж, хэвтэн эмчлүүлж буй хүндээ хоол, цай оруулна гэж уурлаж, бухимдах иргэд олон байсан юм.
Эргэлт оруулах гэж буй бухимдах иргэдийн зүгээс "Эргэлт оруулахгүй байх нь буруу. Эмнэлэгт хэвтэж байгаа хүн хоол, унд сайн идэж, уух хэрэгтэй. Тэгж байж бие тэнхэрнэ. Дан ганц эмнэлгийн хоолоор хоолшихгүй" гэж байв.
Харин эмнэлгийн ажилчдын хувьд “Эмчилгээ хийлгэж байгаа хүнд эмчилгээний хоол илүү тохирно. Хэт их өөх, тостой хоол хэрэглэж болохгүй. Хэт их идэж, уух нь эмчилгээнд сөргөөр нөлөөлөх талтай” гэдгийг учирлаж байгаа харагдлаа.
Харин П.Н.Шастины нэрэмжит Улсын гуравдугаар төв эмнэлгийн хувьд ийм асуудал харьцангуй гайгүй байв. Учир нь эргэлтийг зөвхөн өглөө, орой гэсэн цагийн хуваариар оруулж байгаа бөгөөд тухайн эмнэлэгт хэвтэн эмчлүүлэх иргэдэд эргэлтээр ирэх хүмүүст үүнийг сануулахыг анхааруулжээ.
Коронавирусний халдвар албан ёсоор баталгаажаад буй энэ өдрүүдэд гуравдугаар шатлалын эмнэлгүүдийн нөхцөл байдал иймэрхүү байдалтай байна.
Түүнчлэн зарим эмнэлгүүд халдвараас урьдчилан сэргийлэх үүднээс яаралтай тусламжийн үйлчилгээгээ хоёр хэсэгт хувааж, нэг хэсгээр нь амбулаториор үйлчлүүлэх, нөгөө хэсгээр нь халдварын сэжигтэй иргэдэд үйлчлэх зэргээр зохиуцуулалт хийжээ.
Тиймээс халдвараас урьдчилан сэргийлэх үүднээс эмнэлэгт хэвтэн эмчлүүлж буй иргэд гаднаас эргэлт авахгүй байх, тэднийг эргэхгүй байснаар хайртай хүнээ халдвараас сэргийлэх боломжтой гэдгийг аль аль талдаа анхаарах нь зүйтэй юм.
Нөгөөтээгүүр, халдвар дэгдэх эрсдэл ойрхон байгаа энэ цаг үед иргэн бүр дор бүрнээ ухамсартай байж, ялангуяа эмнэлэгт хэвтэн эмчлүүлж байгаа иргэд эргэлт авна гэж уурлаж бухимдахгүй байх нь зүйтэй биз ээ.
Г.Маргад
