Эрүүл мэндийн яамнаас мэдэгдэл гаргав. Мэдэгдэлд коронавирусний халдвараас урьдчилан сэргийлэх талаар эрүүл мэндийн салбарынхан цаг наргүй ажиллаж байгаа тухай дурджээ. Мөн Франц иргэнийг эмчлэхийн зэрэгцээ ойрын хавьтлын хүмүүсийг цагдаа, хүчний байгууллагатай хамтран илрүүлэн шинжилгээнд бүрэн хамруулсан талаар бичсэн байна. Хачирхалтай нь, тус яамны мэдэгдэлд нэгэн жигтэй үг өгүүлбэр дурайж байх юм.

Мэдэгдэл гэхээсээ салбарын удирдлагуудынх увайгүйтэл, улс төрийн оноо цуглуулах гэсэн үйлдэл унтах нойроо умартан, цаг наргүй ажиллаж байгаа эмч, ажиллагсдаа хөөдөж орхилоо.

Хүн ардынхаа эрүүл мэндийн энхийн манаанд зогсох нь энэ салбарын үүрэг мөн үү мэдээж мөн. Үүнийхээ төлөө ч тангараг өргөдөг. Дэлхийн нийтийг хамарсан шинэ төрлийн коронавирусний халдвараас урьдчилан сэргийлэх талаар Монголын эрүүл мэндийн салбарынхан өөрт ногдсон ажлаа хийцгээж буй. Үүнд нь бид чимээгүйхэн талархаад л сууж байгаа.

Гэтэл хэн гэдэг сайд, дарга нь чиглэл өгсөн юм мэдэхгүй мэдэгдэл хийгээд улстөржөөд сууж байгааг юу гэж ойлгох вэ?.

Хамгийн хачирхалтай нь, тэрхүү мэдэгдэл нь төрийн хэлний бичиг соёл гэж алга. Юуных нь хурган дарга! Бүхэл бүтэн улсын нэгдүгээрт тавигдах чиг үүрэг бүхий салбарын албан мэдэгдэл ингэтлээ гудамжны гэмээр үг хэллэг хэрэглэдэг болтлоо дордчихсон гэж үү.

Угтаа бол коронавирус хэдийнэ хаалга тогшоод ороод ирчихсэн энэ үед Эрүүл мэндийн яам нь мэдэгдэл гаргаж, өөрсдөө улстөржөөд суух нь битгий хэл, нүд цавчилгүй ажиллаж байх ёстой. Тэгж ч байгаа. Хэн нэгэн сайд, дарга нь гэхээсээ өдөр шөнөгүй, цаг наргүй ажиллаж байгаа эмч, сувилагч бүр хүлээсэн үүргээ биелүүлж, урьдчилан сэргийлэх арга хэмжээг сайн авч байгаа учраас Монгол Улс өдий зэрэгтэй яваа. Үүнтэй хэн ч маргахгүй. Иргэд олон нийт ч Улсын онцгой комиссоос гаргасан шийдвэрийг хэрэндээ л биелүүлж, иргэний үүргээ гүйцэтгэж байна. Харин коронавирустэй холбоотой ташаа мэдээллийг нягтлах, шалгах, хариуцлага хүлээлгэх ажлыг цагдаа хууль хяналтын байгууллагынхан хийж байгаа. Тэдний ч үүрэг. Гэтэл ганц хоёрхон сайд, даргаа өмөөрч хийсэн Эрүүл мэндийн яамны үйлдэл мэдэгдэл бус эсрэгээрээ эмч, ажиллагсдынхаа хичээл зүтгэлийг ийн үгүйсгэв.

Ийнхүү эрүүл мэндийн салбарын удирдлагууд нь хууль хяналтын байгууллагынхны хийх учиртай ажлыг шүүрэн авч бүхэл бүтэн яамны хэмжээнд мэдэгдэл хийсэн нь үнэнийг хэлэхэд "бай"-гаа оносонгүй. Эсрэгээрээ өөрсдийг нь муухай харагдуулж байна.

С.Сүлд