COVID19 халдварын талаар Эрүүл мэндийн яамнаас мэдээлэл хийлээ.
ЭМЯ-ны хэлтсийн дарга Д.Нарангэрэл “Коронавирусний халдвар өнгөрсөн 24 цагийн хугацаанд арлын орнуудад шинээр нэмэгдэж, нийт 135 оронд бүртггэдсэн. Мөн Франц, Итали, Норвеги, Иран, АНУ зэрэг улсуудад өвчлөл өндөр эрчтэй тархаж байна. Харин БНХАУ, БНСУ өвчлөлийг хязгаарлаж байна гэсэн мэдээлэл бий” гэлэн.
ДЭМБ-ын мэргэжилтэн О.Ариунтуяа “Өнгөрсөн хоногийн хугацаанд халдвар 9767 нэмэгдэж, 13 улсад халдвар бүртгэгдсэн. 438 хүн нас барлаа. Европ халдварын гол цөм болж, тархалт хурдацтай явагдаж байна. Тиймээс дэглэмийг чангатгаж, аль болох гэрээсээ гарахгүй байх зөвлөмж өгч байна” гэлээ.
ЭМЯ-ны гадаад харилцаа, хамтын ажиллагааны хэлтсийн дарга Б.Янжмаа “Франц улсад өчигдөр шинээр 808 тохиолдол, 12 нас баралт нэмэгдсэн байна. Мөн хүнс, шатахуун, эмийн сангийн үйлчилгээ үзүүлдэг ААН-ээс бусдыг нь хаажээ. Үүнтэй адил Испани улсад хорио цээрийн дэлгэм тогтоожээ. Голомт болж тархаж байгаа Итали улсад эрүүл мэндийн тогтолцоо нь хүнд сорилттой тулгарч байна. Эрчимт эмчилгээний ор нь хүрэлцэхгүй байгаа гэсэн мэдээлэл байна. Шинээр ирэх өвчтөнүүдийг хүлээн авч эмчлэх боломжгүй болсон талаар албаныхан нь хэлсэн байна. Тус улсад шинээр 3497 халдвар нэмэгдэж, 174 нас баралт бүртгэгдсэн байна. Үүнтэй холбогдуулан иргэдийг зайнаас харьцах, аль болох бие биедээ хүрэхгүй байхыг зөвлөж байна. Япон улсад 64 тохиолдол нэмэгдсэн. АНУ-д бүх мужуудад нь халдвар тархсан учир онц дэглэм зарласан” гэв.
ЭМЯ-ны эмнэлгийн тусламжийн газрын дарга Я.Буянжаргал “Сөүл-Улаанбаатар чиглэлд тусгай үүргийн онгоц явж байгаа. Үүгээр 250 зорчигч ирнэ. Эмнэлгийн тусламж үйлчилгээ шаардлагатай гэсэн тухайлбал, хэвтрийн, эмчилгээ шаардлагатай, жирэмсэн зэрэг иргэдийн Цэргийн төв эмнэлэгт байрлуулна. Бусад иргэдийг энгийн дэглэмтэй тусгаарлах байранд байлгана. Иргэдэд хандаж хэлэхэд эмч, эмнэлгийн мэргэжилтнүүдэд хүндрэл учрахаар ирж байгаа хамаатан саднаа тосох ч байдаг юм уу, үйлдэл хийхгүй байхыг анхааруулъя. Нөгөөтэйгүүр, халдвараас архи сэргийлнэ гэдэг ташаа мэдээлэл цацагдсан. Энэ бол ташаа зүйл.” гэлээ.
А.Сүх
