COVID-19 халдварын талаар мэргэжлийн байгууллагуудаас мэдээлэл хийлээ.

ЭМЯ-ны ээлжит хэвлэлийн бага хуралд тус яамны Гадаад харилцааны хэлтсийн дарга Б.Янжмаа “Европын олон улс орон хорио цээрийн дэглэмийг хэсэгчлэн болон бүхэлдээ хориг тавилаа. Өнгөрсөн амралтын өдрүүдэд Франц улс бүрэн хорио тавьсан. Мөн Чех улс дэлгүүр болон аж ахуйн нэгжийн үйл ажиллагааг түр хугацаагаар зогсоосон.

Серб улсад онц байдал зарлаж, нийтийн үйлчилгээнд карантин тавьсан. Мөн Итали, Испани, Франц зэрэг улсуудад халдварын тохиолдол улам нэмэгдэж байна” гэлээ.

Европын холбооны улсуудад халдвар нэмэгдэж байгаатай холбогдуулан гараа сайтар угаах, ариутгах, маск зүүх, шаардлагагүй тохиолдолд гэрээсээ гарахгүй байхыг анхааруулж байна. Учир нь гурав, дөрөвдүгээр сард Монголчуудын дархлаа ихээр сулардаг. Тиймээс дээрх дэглэмийг сайтар сахиж, дархлаагаа дэмжихийг уриаллаа.

Мөн Эрүүл мэндийн яамны зүгээс эрчимт эмчилгээнийхээ орыг нэмэгдүүлэх талаар ажиллаж байгаа аж. Энэ талаар ЭМЯ-ны Эмнэлгийн тусламжийн газрын дарга Я.Буянжаргал “943 хүн тусгаарлах байранд байна. Мөн сэжигтэй тохиолдол гэж 291 хүнд шинжилгээ хийсэн. Франц улсын иргэнд үйлчилсэн гэх нэг иргэн гүйлгэсэн, халуурсан шинжтэй ХӨСҮТ-д тусгаарлагдлаа. Дархан-Уул, Сэлэнгэ аймагт тусгаарлагдсан иргэдийн дунд олон улсаар дамжин ирсэн хүмүүс их байна. Түүнчлэн Сөүл -Улаанбаатар чиглэлийн онгоцоор 244 иргэн ирсэн. ХӨСҮТ-д Дегу хотоос ирсэн 10 иргэнийг тусгаарласан. Энхсаран сувилалд 184 иргэнийг тусгайлан ажиглаж байна.

Өнөөдөр Берлин-Улаанбаатар чиглэлийн нислэгээр 231 хүн ирсэн. Үүнээс халуурсан өгүүлэмжтэй 10 хүнийг ХӨСҮТ-д тусгаарлаад байна.

Орой Токио-Улаанбаатар чиглэлийн онгоц бууна. Одоогийн байдлаар 270 гаруй иргэн ирэх мэдээлэл байна. Үүнээс 50 гаруй хүнд зайлшгүй тусламж үйлчилгээ үзүүлэх шаардлагатай гэсэн мэдээлэл авсан. Бэлтгэл ажлыг хангасан” гэлээ.

А.Сүх