Сөүл, Берлин, Токиогийн чиглэлийн тусгай үүргийн нислэгийн талаар МХЕГ-ын Экспорт, импорт, хилийн хорио цээрийн хяналтын газрын эрүүл ахуй халдвар хамгааллын хяналтын улсын ахлах байцаагч Т.Төмөрбаатар нэгдсэн тайлбар хийлээ.

Тэрбээр “Энэ сарын 15-д Сөүл-Улаанбаатар чиглэлийн нислэгээр 244 зорчигч ирсэн. Үүнээс 10 зорчигчийг сэжигтэй тохиолдол хэмээн үзэж ХӨСҮТ-д тусгаарлан, 50 зорчигчийг Цэргийн төв эмнэлэгт, 184 зорчигчийг “Энхсаран” сувилалд шилжүүлж ажилласан. Мөн нислэгийн багийн 12 хүнийг ажиглалтад авсан. Тухайн үед шинж тэмдэгтэй гэсэн хүн байгаагүй. Эмнэлгийн байгууллагад шилжүүлсний дараа хоёр зорчигч халдвартай болохыг тогтоосон.

Түүнчлэн Берлин-Москва-Улаанбаатар чиглэлийн тусгай үүргийн онгоц энэ сарын 16-ны өдрийн 07.58 цагт бууж, нийж 231 зорчигч ирсэн. Эдгээр зорчигч бүгд тусгаарлагдсан. Мөн нислэгийн есөн багийн хүн багтаж байгаа. Тиймээс ямар нэгэн байдлаар сэжигтэй иргэдийг тусгаарлаагүй гэдэг нь ташаа мэдээлэл. Берлин-Москва-Улаанбаатар чиглэлийн нислэгээр халдвартай нь тогтоогдсон нэг иргэн үзлэгийн үеэр халуунтай байсан. Тиймээс ХӨСҮТ-д шилжүүлж ажилласан. Энэ хүрээнд тусгаалалтын бүх ажлыг хийсэн. Бүх үйл ажиллагаа хяналтад байгаа гэж ойлгож болно.

Мөн өчигдөр Токио-Улаанбаатар чиглэлийн онгоц 20.53 цагт буусан. Нийт 253 иргэн ирснээс 25 зорчигчийг ХӨСҮТ-д 56 зорчигчийг Цэргийн төв эмнэлэг үлдсэнийг сувилуудад тусгаарласан. Энэ үеэр нислэгийг хэрхэн хийх талаар Мэргэжлийн хяналтын байгууллагаас чиглэл өгч ажилласан. Нислэгийн явцад бүх зорчигчийг хоёр цагийн зайтай амны хаалтыг солиулсан. Бүх үйл ажиллагаа дэглэмийн дагуу явагдсан. Тусгаарлалтаас гадуур үйл ажиллагаа байхгүй” гэлээ.

А.Сүх