Энэ сарын 15-нд БНСУ-аас ирсэн хоёр иргэн, Франц улсаас ирсэн нэг иргэнээс халдвар илэрсэн талаар Эрүүл мэндийн яамнаас мэдээлсэн билээ. Уг асуудалтай холбогдуулан дээрх иргэд халуунтай байхад нь тусгаарлаж авчирсан уу гэдэг асуудал нийгэмд үүсээд буй. Тэгвэл үүнийг салбар яамнаас үгүйсгэсэн юм.
Халдвартай болох нь батлагдсан иргэдтэй ойрын харьцагч 112 хүнээс шинжилгээ авсан. Үүнээс 61 хүнээс халдвар илрээгүй бол бусад иргэдийн шинжилгээний хариу удахгүй гарах аж.
БНСУ, Герман, Японоос ирсэн онгоц тус бүрийн зорчигчийг тус тусад нь тусгаарласан. Үүссэн нөхцөл байдалтай холбогдуулан Улсын онцгой комиссын өнөөдрийн хуралдаанаар дараах шийдвэртэй холбогдуулан дараах мэдээллийг өглөө.
Энэ талаар УҮК-ийн дарга Ө.Энхтүвшин: "Баян-Өлгий аймгийн онцгой комисстой онлайнаар холбогдсон. Казахстанд суралцдаг оюутнууд Цагааннуур боомтоор орж ирсэн. Бүгдээрээ тусгаарлагдсан. Цаашид авах арга хэмжээг нутгийн удирдлагуудаас авсан.
Монгол Улсад халдварын дөрвөн тохиолдол бүртгэгдлээ. Францаас ирсэн нэг иргэн, Солонгосоос ирсэн хоёр иргэн. Францаас ирсэн хүний бие хүнд. Солонгосоос ирсэн хоёр иргэний биеийн байдал хэвийн байна.
Гадаад дахь монголчуудаа татаж авахаа төрийн зүгээс удаа дараа илэрхийлсэн. Энэ хүрээнд Солонгос, Япон, Турк, Европи руу захиалгат нислэг хийсэн. Эрсдэлтэйг бид мэдэж байсан. Тиймдээ ч бэлтгэлээ сайтар хангасан. Ирсэн иргэдийн бүртгэлийг нарийн гаргасан. 750 орчим хүн ирсэн. Бүгдийг нь шууд тусгаарласан. Үзлэг хийгдэж байна, нягталж байна. Халдвар авсан иргэдээ хурдан эдгээх, халдвар авахаас сэргийлэх ажил хийгдэж байна.
Улсын онцгой комисс болон Эрүүл мэндийн яамны мэдээлэлд иргэд итгэх ёстой. Төрийн ажлын хүчийг сааруулах гэсэн далд болон ил санаатай элдэв мэдээлэл цацаж байна. Тиймээс сэтгүүлчид ч гэсэн үүнд анхаарах хэрэгтэй байна.
Сүүлийн үед халдварын нөхцөл байдлыг ашиглаж улс төрийн болон хувийн ашиг хонжоо олох гэсэн хэсэг бүлэг хүмүүс байна. Ийм байж болохгүй, хариуцлага ярина шүү гэдгийг анхааруулъя. Сургууль, цэцэрлэгийн карантин сунгах эсэхийг БСШУС-ын сайд санал оруулж ирнэ. Үүний дараа шийднэ". Халдвартай иргэнийг тусгаарлаж авчирсан гэдэг зүйл яригдаж байна. Тийм зүйл байхгүй. Франц иргэн Монголд ирээд зургаа хоногийн дараа халуурсан шүү дээ. Тиймээс хүний биеийн байдлаас хамаарч шинж тэмдэг илэрч байна гэдгийг ойлгох хэрэгтэй.
Баян-Өлгийн хорио цээр хэвээр үргэлжилж байна. Тэнд сэжигтэй нэг тохиолдол бий. Давтан шинжилгээний хариуг харж байж дараагийн алхмаа авна.
Эх орондоо эргэж ирэх хүсэлтэй иргэдийг онгоцонд суудал байвал авчирна. Үнэхээр суудал байхгүй бол хэцүү. Нэн тэргүүнд шаардлагатай хүмүүсээ авчирна. Зураглаачийг яагаад Солонгос руу явуулсан бэ гэдэг учиртай. Энэ нь тухайн газрын нөхцөл байдлыг дүрсжүүлэх шаардлагатай гэдэг утгаараа авч явсан. Нөгөө талаасаа ард иргэдэд сэрэмжлүүлгэ болгох үүднээс бичлэг хийхээр явсан юм.
Эрүүл мэндийн сайд Д.Сарангэрэл: "Дэлхий хэмжээнд халдварын улмаас 7000 гаруй хүн нас барсан. Манай улсын хувьд 1300 гаруй хүн тусгаарлагдсан. Франц иргэний биеийн байдал сайжирсан. 257 хүнээс 88 нь Франц улсын иргэнтэй ойрын харьцагч. Давтан шинжилгээгээр халдваргүй гэж гарсан. Шинээр бүртгэгдсэн гурван тохиолдлыг хурдасгасан оношлуураар оношилсон. Өглөө аппаратаар баталгаажуулсан".
Үүний дараа цагдаа болон бусад холбогдох байгууллагаас эдгээр гурван иргэнтэй ойр байсан 113 иргэнийг ХӨСҮТ-д хүргэж, шинжилгээ авсан. Хариу эхнээсээ сөрөг гарч байна.Эмчилгээний хувьд ДЭМБ-ын зөвлөмжийг мөрдөж байна. Халдвар агаар дуслаар дамждаг учир хэн ч, хэзээ ч өвдөх эрсдэлтэй". Туркийн нислэг маргааш ирнэ. Хяналт шалгалтыг мөн адил дагаж мөрдөнө.
Гадаад харилцааны сайд Д.Цогтбаатар: "Францаас ирсэн халдвартай хүний хувьд Москвагаас суусан. ОХУ-ын талаас нарийн шалгасан. Бид ч шалгасан. Бүх хүнийг масктай оруулсан. ариутгал хийсэн".
ОБЕГ-ын дарга Т.Бадрал, хошууч генерал: "Тэр хүн халуунаа тогтмол үзсэн. Онгоцны баг болон "Хера" интертайнментийн зураглаач мөн адил тусгаарлагдсан".
Г.Эрдэнэ
