Дэлхий нийт коронавирусний өмнө аль чадлаараа хүчин мөхөстөх болов. Хилээ хаахаас эхлээд дотооддоо хөл хорио тогтоож хэрэндээ л тэмцэж байна. Монгол Улсын хувьд ч мөн адил хийж, хэрэгжүүлж болох бүхий л арга хэмжээг шат шатандаа авч буй. Эхний ээлжид дотооддоо онц дэглэм тогтоож, коронавирусээс урьдчилан сэргийлэх алхмыг хийсэн бол энэ удаад тусгай үүргийн гурван удаагийн нислэгээр БНСУ, Япон, Европын орнуудаас 731 иргэнээ авчрав.
Хэдийгээр хил дамнан эх орондоо авчирсан иргэдийн дундаас коронавирусний зургаа дахь тохиолдол илрээд байгаа ч энэ нь айж сандрах, шүүмжилж, бухимдах шалтгаан биш юм. Урд хөршид халдвар эрчимтэй дэгдсэн нэгдүгээр сараас өнөөдрийг хүртэл нийт иргэдээ бид хамгаалж чадсан уу гэвэл чадсан.
Үүгээр нь Засгийн газар, Улсын онцгой комисст харин ч алга таших ёстой. Цаг алдалгүй түрүүлж шийдвэр гаргасны үр дүнд Монгол Улс дотоодоосоо коронавирусний халдвар гаргалгүй сэргийлж чадсан. Юу үнэн энэ үнэн.
Одоо эх орноо гээд зориод ирсэн тэднийг эмчилж, эдгээх нь бидний үүрэг, цаг хугацааны л асуудал болж байна.
Хэд хоногийн өмнөхөн Австралийн иргэд Перуд гацчихсан 300 мянган ам.доллар босгох гээд байж болох бүхий л арга замыг эрэлхийлж байгаа тухай мэдээлэл гаднын хэвлэлүүдээр гарсан. Монгол Улстай харьцуулахад мөнгөтэй л улс. Гэвч цагаа тулахад хил цаана үлдсэн иргэдээ ч татах боломжгүйд хүртлээ цар тахлын өмнө хүчин мөхөстөж эхэлсний бодит жишээ. Герман гэхэд 153 хүнээ Тунисаас татлаа. Тус улсын канцлер Ангела Меркель ард түмэндээ хандаж үг хэлэхдээ цар тахлын талаар "Дэлхийн II дайн, хоёр Герман нэгдсэнээс хойш бидэнд ийм том сорилт тулгарч байсангүй. Энэ бол үнэхээр ноцтой зүйл. Герман ардчилсан төр учраас ард түмэндээ үнэнийг нууж хаалгүй хэлж байна. Бид эв нэгдлээр давж гарна" гэж мэдэгдэв.
Мөн “Герман улс эрүүл мэндийн маш сайн тогтолцоотой. Дэлхийд хамгийн шилдэг нь. Гэвч бид илүү олон ор бэлдэж, олон хүнд эмнэлгийн тусламж хүргэх шаардлагатай болоод байна. Энэ долоо хоногоос Засгийн газраас авах цар тахлын эсрэг арга хэмжээ, журмыг иргэд эв нэгдэлтэйгээр дагаж биелүүлэх хэрэгтэй байна" гэжээ. Үүнээс харахад Герман хөл хорионы хатуу дэглэм тогтоож магадгүй байна. Меркелийн энэхүү мэдэгдлийг германчууд дэмжиж буйгаа илэрхийлж эхлээд байна.
Улс орнууд одоо л бидний авсан хөл хорио тогтоох, иргэдээ татах ажлыг хийж эхэлсэн нь энэ. Тэгэхээр Монголын Засгийн газар сүржигнээгүй, хийх ёстой л ажлаа хийж байна. Гол нь бусдаасаа түрүүлж.
Дэлхийн зарим улс орон иргэдээ татах нь битгий хэл хилээ хэдэн сараар хаах шийдвэрийг гаргаж, гал унтраах арга замыг эрэлхийлж байгаа бол Монгол Улс хувьд хилийн чинадад байгаа иргэдээ түрүүчээс нь татаж, авчирлаа.
Энэ талаар Ерөнхий сайд У.Хүрэлсүх “Коронавирусээр улс төр хийх гэж оролдсон, хүний өвчин зовлонгоор тоглох гэсэн санаа бодолтой хүмүүс байгаа. Эдгээр хүмүүстэй хариуцлага тооцох ёстой. Иргэн нь, нялх нойтон хүүхдүүд нь, хөгшин настай эмээ, өвөө нар, жирэмсэн эхчүүд хүний нутагт түгжигдсэн байдалтай мөнгөгүй, орох оронгүй байж байна. Ийм хүмүүсээ Монгол Улс татаж авах ёстой. Энэ бол Үндсэн хуулийн хүрээнд хийж байгаа ажил.
Монгол хүн эх орондоо ирэх эрхтэй. Эрүүл мэндээ хамгаалуулах эрхтэй. Тиймээс авчирсан хүмүүсээ хорио цээрийн дэглэмд цаг хугацаанд нь байлгах ёстой. Тусгай чиг үүргийн онгоц нисгэж иргэдээ татаж авах хэрэгтэй.
Ийм байдал үүснэ гэдгийг урьдчилан тооцоолж чадсан учраас халдварыг гадагшаа алдахгүйгээр барьж чадлаа. Нэг ёсондоо вакуумжуулсан орчинд авчраад хорио цээрийнх нь дэглэмийг сахиулаад, дүрэм журмынхаа дагуу ажиллаж байна. Нэг ч Монгол хүний амь нас битгий эрсдээсэй гэдэг үүднээс ажиллах ёстой” гэжээ.
Ерөнхий сайдын хэлдэг үнэн. Өнгөрсөн хугацаанд коронавирусний тархалтаас улсаараа урьдчилан сэргийлж чадсан шигээ халдвар авсан иргэдээ эмчлэх, эдгээх шаардлага бидэнд тулгараад байна. Ингэхийн тулд Улсын онцгой комисс сайн ажиллаж байгаа шиг иргэний үүргээ ухамсарлаж, хаа хаанаа хариуцлагатай байх нь чухал.
Г.Эрхэс
