МНСЭ-ын Ерөнхийлөгч асан, сэтгүүлч Галаарид "Молор" телевизээ эрх мэдэлтнүүдэд алдсан талаар мэдээллээ.

Тэрбээр Ерөнхийлөгчийн Тамгын газрын дарга асан З.Энхболдтой холбоотой элдэв мэдээлэл цацагдаж байна. Үнэн худлыг цаг хугацаа харуулах байх. Би энэ хүнийг тодорхой хэмжээнд мэднэ. Тиймээс энэ удаагийн мэдэгдлээ хийж байна. Би СНЭ-ийн ерөнхийлөгч болохоос өмнө шинжлэх ухаан, танин мэдэхүйн "Цалиг" гэж нийслэлийн хэмжээнд үйл ажиллагаа эрхлэх зөвшөөрөлтэй сувагтай байсан. Энэ сувгийг 2012 оны нэгдүгээр сараас нэг жилийн хугацаатай авсан. Нэг жил гэдэг бол маш богино хугацаа. Хугацаагаа сунгуулахаар бичиг баримтаа хөөцөлдөх явцад зургаан метрийн өндөртэй таазгүй бол тусгай зөвшөөрөл сунгахгүй гэсэн. Ажилчдаа авчихсан, тоног төхөөрөмж, албан тасалгаагаа бэлдчихсэн байсан. Ийм үед тусгай зөвшөөрлөө алдах үнэхээр хэцүү байсан. Гэтэл танилууд маань З.Энхболдын төрсөн дүү З.Хишигтогтохтой уулзах санал тавьсан.

Түүнтэй уулзахад туслана гэсэн. Гэхдээ 50 хувиа өг гэсэн. Би өгсөн. Тэр үед Харилцаа холбооны зохицуулах хорооны даргаар Балгансүрэн гэж хүн байсан. Энэ хүн З.Хишигтогтохтой "Болдсофт" гэж компанийг хамтран байгуулж байсан гэдгийг саяхан мэдлээ. 

Тухайн үед асуудал маш хурдан шийдэгдсэн. Уг нь надад болохоор тусгай зөвшөөрөл өгөхгүй байсан шүү дээ. Тусгай зөвшөөрөл сунгах үед "Цалиг" гэж нэр таалагдахгүй байна, дундын компани байгуулна гэсэн. Гал, нар,сар гээд 50, 50 хувийн эзэмшилтэй компани байгуулсан. Нөгөө талын 50 хувийн эзэмшигчээр хоёр хүн орж ирсэн. Нэг З.Энхболдын зөвлөх Буянцогт, нөгөөх нь төрсөн дүү нь болох З.Хишигтогтох. 

Үүний дараа 2012-2015 он хүртэл кабелийн сувгийн үйлчилгээ үзүүлэх эрхтэй Молор телевиз нэвтрүүлгээ цацсан. 28 сар үйл ажиллагаа явуулахад долоон сарын үйл ажиллагааны зардлыг 50 хувь эзэмшигч гаргасан. Үлдсэн 21 сарын зардлыг би өөрөө гаргасан. 

Би сэтгүүл зүйгээс өөр салбарт ажиллаж үзээгүй. Шинжлэх ухаан танин мэдэхүйн чиглэлийн телевиз нээсэн нь энэ. Гэтэл телевизийн салбар хэцүүдсэн учир "Эн си Пи" цамхагт байрлах "Ecode" компанид зарахаар болж, шилжүүлсэн. Шилжүүлсний дараа Улаанбаатар хотын хэмжээнд үйл ажиллагаа явуулах тусгай зөвшөөрөл Монгол Улсын хэмжээнд үйл ажиллагаа явуулах тусгай зөвшөөрөл авсан байгаа юм. 

Эзэмшигч нь н.Батдэлгэр гэж хүн болоод хаяг нь Сонгинохайрхан дүүрэг дэх Интеркомпанид очсон. Энэ компани бол З.Энхболдынх. Ингэхдээ Молор телевизийг Малчин телевиз болгож, Монгол Улсын хэмжээнд кабелийн телевизийн үйлчилгээ эрхлэх зөвшөөрөл авсан байна. 

Энэ бол ганцхан телевиз дээр гарч ирсэн бизнесийн тойрог. Үүнээс илүү том бизнес дээр яаж нуугдаж, сүлжээ болдогийг эндээс харж болно. Улстөрчид аливаад нөлөөлчихөөд ард нь сугарч үлддэг. Үүний жишээ нь З.Энхболд. Миний санхүүгээр хохирсон эсэх асуудал энд чухал биш. Хамгийн гол нь энгийн иргэд ямар нэгэн бизнес эрхлэх гэхээр элдэв шаардлага тавиад саад болдог. Эрх мэдэлтнүүд болохоор ганц дуугаар бүх ажлаа амжуулдаг. Ийм систем байж болохгүй" гэлээ. 

Г.Маргад