Улсын онцгой комиссын Шуурхай штабаас цаг үеийн асуудлаар мэдээлэл хийлээ. Энэ үеэр энэ сарын 17-ноос эхлэн нийслэлийн төв талбай, орон сууц хоорон дахь зам, талбайд ариутгал хийж байна. Өнөөдрөөс Баянзүрх дүүрэгт ариутгалын ажил хийх юм байна гэдгийг онцоллоо.
Тодруулбал, ОБЕГ-ын дэд дарга, хурандаа Б.Ууганбаяр "Замын-Үүд боомтоор Монгол Улсын 30 иргэнийг татан авах ажиллагаа одоо явагдаж байна. Мөн тооны том оврын ачааны машины жолоочийг татаж авна. Машин байна уу, хүн байна уу гэдгээс үл хамаарч холбогдох дүрэм журмыг хангаж ажиллаж байна. БНХАУ-аас тодорхой тооны амны хаалт, бээлий зэрэг шаардлагатай эд зүйл ирнэ. Монгол Улсын хил рүү хөдөллөө гэсэн мэдээлэл түрүүн ирсэн.
Тусгаарлах байрнаас гарсан иргэд ухамсартай байгаарай. Битгий гадуур тэнээд байгаарай. Ар гэрийнхэн нь хяналт сайн тавиарай.
Түүнчлэн ажлаас нь халах тухай гомдол ирсэн. Аж ахуйн нэгж, төрийн байгууллага ийм байж болохгүй. Тусгаарлах байрнаас гарсан иргэдэд тусгаарлах байранд байсан гэдэг бичиг өгнө. Нийгмийн хариуцлагыг ААН-үүд ухамсарлах хэрэгтэй шүү.
Сүүлийн үед иргэдийн эрч нь суларч байна. Хэтэрхий хайхрамжгүй болж байна. Эхлэлийг нь харсан юм чинь эцсийг нь үзэх нь бид бүхний үүрэг шүү. Тусгаарлах байранд байгаа иргэд төлбөрөө төлсөн. Ямар нэг асуудал үүсэхээ больсон" гэлээ.
Г.Маргад
Сэтгэгдэл (5)