Улсын онцгой комиссын шуурхай штабаас мэдээлэл хийлээ.

Мэдээллийн эхэнд Онцгой байдлын ерөнхий газрын дарга, хошууч генерал Т.Бадрал “Коронавирусний халдварын нэг тохиолдол дахин нэмэгдлээ. Нөхцөл байдал амаргүй байна. Гэсэн хэдий ч УОК-ын шуурхай штаб асуудлыг шийдвэрлэхээр ажиллаж байна. ГХЯ-аас өгсөн мэдээллээр 4805 хүн эх орондоо ирэх хүсэлтээ ирүүлжээ.

Дэлхийн 100 гаруй улс иргэдээ гадаад улсаас татаж авч байгаа юм билээ. Өнөөдөр Австралийн Засгийн газраас хүсэлт ирүүлж зургаан иргэнээ манай улсаас татаж авсан. Мөн БНСУ-аас 200 орчим Солонгос иргэнээ татан авах ажил хийгдэнэ. Манай улсын хувьд таван удаагийн нислэгээр иргэдээ татаж авсан. Мөн энэ сарын 28-ны өглөө 06.00 цагт ОХУ-аас иргэдээ авах ажиллагаа зогсоно.

Мөн ойрын хугацаанд гурван нислэгээр иргэдээ авах шийдвэр гаргалаа. Нэгдүгээр нислэг Сөүл, хоёрдугаар нислэг Токио, гуравдугаар нислэг эргээд Сөүл рүү явна. Эдгээр нислэгээр нийт 750 гаруй иргэн ирнэ гэсэн тооцоо гаргасан. Нислэгээр ирэх иргэдийг 14 хоног тусгаарлаж, долоо хоногийн хугацаанд гэртээ тусгаарлалтад орно. Энэ ажил зайлшгүй үргэлжилнэ. Дараагийн нислэгээр ирэх иргэд хамгийн багадаа 21 хоног тусгаарлагдана. Улмаар тусгаарлалтын төлбөрөө төлөх, тухайн улсдаа шинжилгээ өгсөн байх зайлшгүй шаардлагатай. Ингэж байж онгоцонд суулгахгүй бол болохгүй байна.

Хоёрдугаарт, 21 хоног тусгаарлалтад байх учраас хувийн ажил төрлөө зохицуулах шаардлагатай” гэлээ.

Б.Лхам