УИХ-2020 оны ээлжит сонгууль болоход хоёр сарйн хугацаа үлдээд байна. Үүнтэй холбогдуулан Сонгуулийн ерөнхий хороонд хэд хэдэн үүрэг өгсөн байна.

Тухайлбал, болзошгүй ажлын төлөвлөгөөг баталж яаралтай хэлэлцэх, эрх бүхий байгууллагуудад саналаа хүргүүлэх. Өөрөөр хэлбэл, эрсдэлтэй үед яаж ажиллах, юу шаардлагатай байгаагаа хэлж, санал авах хувилбарыг дэвшүүл гэсэн байна. Мөн сонгогчдыг олноор нь цуглуулахгүй байх тал дээр анхаар нэр дэвшигчдийн сурталчилгааг хэрхэн тараах асуудлаар санал солилцсон аж. Энэ талаар Сонгуулийн ерөнхий хорооны дарга Ч.Содноцэрэн "Эрх бүхий байгууллагаас сонгуулийг хэрхэх тухай шийдвэр гаргатал СЕХ хуулиар олгогдсон үнсэн ажлаа хэвийн үргэлжлүүлнэ. Монгол Улсад хүчин төгөлдөр үйлчилдэг хуулиад сонгууль хойшлуулах талаар тусгайлсан заалт бий. Тиймээс эрх баригчид эрх хэмжээнийхээ хүрээнд шийдвэр гаргах боломжтой" гэдгийг өнөөдөр мэдээлсэн юм.

Тэгвэл өнгөрсөн сард Монгол Улсын Ерөнхийлөгч Х.Баттулга сонгууль хойшлуулах уриалга гаргаад байсан. Одоогоор Ерөнхийлөгчийн уриалгыг хэлэлцэх эсэх нь тодорхойгүй байна. ДЭМБ-аас мэдэгдэж байгаагаар шинэ төрлийн коронавирусний халдварын ид дэгдэлт нь дөрөв болон тавдугаар сар гэж буй. Энэ утгаараа өндөржүүлсэн бэлэн байдлын хугацааг сунгавал УИХ-ын ээлжит сонгуулийг хойшлуулахаас өөр аргагүй болно. 

Зарим нам эвслээс сонгуулийг цахимаар явуулах санал гаргасан. Тэгвэл манай улсын хувьд ийм аргачлалыг 2012 оноос судалж эхэлсэн байдаг. Тухайлбал, Истони улс цахимаар саналаа өгөх тусгайлсан хуультай. Ингэхдээ Цахим сонгуулийн хороо гэсэн тусдаа байгууллагатай байдаг юм байна. Түүнчлэн дэлхийн олон улсад цахимаарс санал өгөх хувилбарыг судалж байна. Харин манай улсад ийм нөхцөл үүслээ гэхэд нөөц боломж тааруу гэдгийг СЕХ-ны дарга мэдэгдсэн. Учир нь Эстони шиг тусгайлсан хууль байхгүйн дээр техник хэрэгсэлд их хэмжээний зардал гаргана гэлээ. Тэрбээр "АНУ-д тодорхой хүрээний саналыг цахимаар авдаг. Өөрөөр хэлбэл, гадаад байгаа иргэд болон цэргийн албан хаагчдийн саналыг цахимаар авдаг. Гэхдээ мөн адил тусгайлсан хуулиар зохицуулсан байдаг гэсэн юм.

Г.Маргад