УИХ-ын өнөөдрийн чуулганаар “Алсын хараа-2050”  Монгол Улсын урт хугацааны хөгжлийн үзэл баримтлал батлах турхай” УИХ-ын тогтоолын төслийг чуулганаар хэлэлцэх эсэхийг хэлэлцэж байна.

Энэ үеэр УИХ-ын гишүүн, УИХ дахь МАН-ын бүлгийн дарга Д.Тогтохсүрэн “Ажилгүйдлийг бууруулах чиглэлээр ямар алхам хэрэгжүүлэх юм бэ. Мөн төвлөрлийг сааруулах асуудлыг ярихаас аргагүй. Эдийн засаг, хүн ам, засаг захиргааны гээд бүх салбарт төвлөрөл үүслээ. Үүнийг хэрхэн тусгасан бэ. Түүнчлэн Монгол Улс гадаргууны усаа огт ашиглаж чадахгүй байна. Үүнээс болж цөлжилт ихээр явагдаж байна. Нийт хэрэглээний 60 орчим хувийг гүнийн усар хангаж байна. Энэ асуудлыг бодлогын баримт бичигт хэрхэн тусгасан бэ".

УИХ-ын гишүүн ЗГХЭГ-ын дарга Л.Оюун-Эрдэнэ “Хөгжлийн бодлого баталдаг ч нэгдүгээрт, төрийн захиргааны төв байгууллагын хэрэгжүүлэх механизм учир дутагдалтай байна. Нэг үгээр хэлбэл, үндэсний бодлогыг Үндэсний хөгжлийн газар хариуцдаг. Энэ газар нь агентлагын статустай. Агентлаг сайдуудыг нэгдсэн удирдлагаар хангах боломж хомс. Тиймээс Үндсэн хуулийн нэмэлт өөрчлөлтөд эрдэмтдийн саналыг тусгахаар УИХ-ын даргад танилцуулсан. Эндээс Монгол Улсын хөгжлийн бодлого төлөвлөлт тогтвортой байна. Хөгжлийн бодлогыг урт хугацаагаар төлөвлөнө гэсэн заалт Үндсэн хуульд орсон.  Энд тулгуурлаад Монгол Улсын хөгжлийн бодлого төлөвлөлтийн хуулийг Алсын хараа-2050 хамт өргөн барихаар төлөвлөж байна. Нөгөө талаасаа  улсын хэмжээнд 567 хөгжлийн бодлогын салангид баримт бичиг байна. Энэ бүхнхийг нэг номонд багтаах хэрэгтэй байна.  

Энэ хүрээнд Улаанбаатар хотын төвлөрлийг сааруулах, ажилгүйдлийг бууруулах зэрэг бүх асуудал тусгагдсан. Энэ талаар Үндэсний хөгжлийн газар хариулах нь зүйтэй байх.

ҮХГ: Энэ төсөлд хүн ардын амьдралын чанар дээшилсэн эсэхийг харуулна. Анализ хийгээд үзэхэд хүн амын 1/3 нь ядуу, ажилгүйдэл их байна. Энэ бүхэн юунаас болж байна вэ гэхээр хуримтлалгүй эдийн засгаас болсон байна. Ажилтай бол бага ч гэсэн хуримтлалтай байна шүү дээ. Үүнийг үе шаттай авч үзсэн. 2050 онд нэг хүнд оногдох ДНБ-ний хэмжээ 15 мянган ам.доллар,  нийт ДНБ-ний хэмжээ 78 миллиард ам.долларт, хүний хөгжлийн индекс 0.9-д хүрнэ гэсэн тооцоо бий. Хүний хөгжлийн асуудал хамгийн чухал зүйл. Боловсролтой ухамсартай иргэн өөрөө өөрийгөө аваад явж чадна. Үүнд төр туслах ёстой. Хөрөнгө оруулалтыг тооцсон. Эдийн засгийн өсөлт 5-6 хувь байна. Нийт 700 миллиард ам.долларын хөрөнгө оруулалт ирэх 30 жилд хийгдэнэ.

Төвлөрлыг сааруулах, ажилгүйдлийг бууруулах чиглэлээр олон арга хэмжээ авахаар олон улсын байгууллага, эрдэмтэдийн саналыг боловсруулсан. Нийт 22 шалгуур үзүүлэлтийн хүрээнд зургаан бүсийг тодорхойлсон. Өөрөөр хэлбэл, газрын дээр болон доор байгаа баялагийг хөрш орны эдийн засгийн макро бүс рүү хэрхэн нийлүүлэх чиглэлээр тусгасан. 

Г.Маргад