Монголын Тээвэр холбоо, газрын тосны ажилтны үйлдвэрчний эвлэлийн холбоо болон Монголын Шатахуун хэрэглэгчдийн холбоо(ШХХ)-ноос шатахууны үнийг 650 төгрөгөөр бууруулах боломж байгаа талаар мэдээлэл хийлээ. 

Тэдний зүгээс дэлхийн зах зээл шатахууны үнэ хямдарчихаад байхад яагаад зах зээлийнх нь зарчмаар явахгүй байгаа юм бэ гэдэг шаардлагыг холбогдох байгууллагууд руу хүргүүлсэн. Хариу нь ирээд байна УУХҮЯ, АМГТГ ч тэр 50, 200 төгрөгөөр бууруулна зэргээр иргэдэд мөсөн чихэр долоолгож байна. Бидэнд зах зээлийн судалгаа бий. Хэрэв шатахууны үнэ буурчихвал өргөн хэрэглээний бараа бүтээгдэхүүн хийгээд нийтийн тээврийн үнэ тариф буурна гэдгийг онцолж байлаа. 

Энэ талаар МШХХ-ны Гүйцэтгэх захирал Г.Сайнбаяр "УУХҮЯ-ны барьдаг жишиг үнэ буюу Сингапурын биржийн сүүлийн 120 хоногийн баррель нефтийн үнэ 2020 оны нэгдүгээр сард 69 ам доллар байсан бол өнөөдөр 26 буюу 40 доллароор буучихаад байхад Монгол Улс 50 төгрөгөөр үнэ нь буурчээ. 

Дөрөвдүгээр сард Монголын шатахуун импортлогчид 1190 литр буюу нэг тонн дизел түлшийг “Роснефть” компаниас 1.029.000 төгрөгөөр худалдаж авсан байна.  

Импортлогч компаниуд НӨАТ, авто бензин, дизелийн түлшний татвар гээд бусад бүх  татварыг оруулаад нэг тонн дизелийн түлшинд 495.000 төгрөгийн татварт төвлөрүүлж байна. Бусад зардал гэдэгт “Роснефть”-ээс Монгол Улсад ирэх төмөр замын зардал 16.400, агуулахаас ШТС руу явах 4200 төгрөг.  Хамгийн хачирхалтай зардал нь бидний тооцсоноор ШТС-иуд 18 хувийн банкны хүүгийн мөнгөө ард түмнээр төлүүлж байна. 

Тиймээс 300 төгрөг бол бодит бууралт биш. АИ-80, АИ-92 бензинийг 500, дизель түлшийг 650 төгрөгөөр бууруулах боломж байна.

Шатахууны үнийг 300 төгрөгөөр бууруулна гэдэг бол ашгаа 10 хувь бууруулж байна гэсэн үг. Харин бид ашгаа 20 хувь бууруулах шаардлага тавьж байгаа. Бидний шаардлагыг албан ёсоор хүлээж авахгүй бол энэ сарын 16-нд Энхтайваны өргөн чөлөөг хааж, 100 машины жагсаал хийнэ” гэлээ.

А.Сүх