ОБЕГ-ын дарга, хошууч генерал Т.Бадрал УОК-оос гаргасан шийдвэрийн талаар мэдээлэл өглөө. 

Тэрбээр “Цаашид гадаадаас ирж байгаа иргэд өвчний халдвар тээгч, импортлогч болж байна. Хоёрдугаарт, онгоц халдварын том эрсдэл болж байгаатай холбогдуулан гадаадад байгаа иргэд наашаа ирэх гэж яарах шаардлагагүй. БНХАУ-ын Эрээн хотоос хүсэлт гаргасан 50 иргэнийг татан авах бэлтгэл ажлыг хийсэн байсан. Маргааш энэ ажлыг зохион байгуулна. 

Хилийн чанадаас эх орон руугаа ирэх хүсэлт гаргасан, мөнгөний бололцоо буурсан иргэдэд шийдвэр гарлаа. Ямар хүмүүст тэтгэлэг олгогдох талаар шалгуур гарсан. Халдвараас урьдчилан сэргийлэх ажлыг эрчимжүүлэх зорилгоор 1400 хэсгийн байцаагч нарт олон нийтийн цагдаагийн эрх олголоо.

Мөн Замын-Үүд болон Гашуунсухайт боомтын ажлыг өргөтгөх ажил явагдаж байгаа. Төсөл эхлэх шаардлага зайлшгүй үүссэн учраас өргөтгөлийн ажлыг эхлүүлэх, барилга байгууламж дээр ажиллах, БНХАУ-ын иргэдийг хүлээн авах ажиллагааг хийнэ. Бэлтгэл ажлыг хангах шийдвэр гарсан. Эдгээр иргэдийг эхлээд тугаарласны дараа барилгын ажлыг үргэлжлүүлнэ.

Түүнчлэн халдвар тархсан үед хэрхэн ажиллах талаар бэлтгэл ажлыг хангах чиглэл Ерөнхий сайд өглөө. Энэ хүрээнд бэлтгэл ажлыг зайлшгүй хийх шаардлага гарч байна. Бидэнд боломж байна. ОБЕГ, БХЯ хамтран хээрийн эмнэлгүүдийг шинээр хийсэн. Энэ сардаа багтан УОК-ын гишүүн байгууллагуудыг хамруулан эрсдэл үүссэн үед хэрхэн ажиллах бэлтгэл ажлыг хийхээр боллоо. Мөн нэг зүйл нэмж хэлэхэд маск зүүгээгүй бол санаатайгаар вирус тарааж байна гэсэн үг. Тиймээс гэмт хэрэгтэнд тооцогдоно" гэв.

Б.Лхам