“Монос косметикс” компани болон “Нахиа импекс” компаниуд гар халдваргүйжүүлэгч үйлдвэрлэхдээ техникийн спирт ашигласан тухайг УОК-ын Шуурхай штабын хурлын үеэр мэдэгдсэн билээ. Тэгвэл уг асуудал “Монос” компанийн зүгээс эсрэг байр суурь илэрхийлсэн юм. Тэгвэл “Монос косметикс” компани 2020 он гарсаар 49.3 тонн техникийн этилийн спирт авчээ.

Мөн гар халдваргүйжүүлэх бодис үйлдвэрлэх тусгай зөвшөөрөл аваагүй атлаа гар халдваргүйжүүлэгч үйлдвэрлэж, үүндээ техникийн спирт ашигласан болох нь тогтоогдсон байна. Шалгалтаар 310 мл-ийн савалгаатай “Санитас” 1296 ширхэг, 50 мл-ийн савалгаатай “Санитас” гар ариутгагч шүршигч 3360 ширхэгийг хураан авч лацадсан байна. Ингээд энэ талаар МХЕГ-аас тодруулснаа хүргэе.

-“Монос косметикс”, “Нахиа импекс” компани гар халдваргүйжүүлэгч үйлдвэрлэхдээ техникийн зориулалттай этилийн спирт ашигласан тухай УОК-ын хуралдааны үеэр мэдэгдсэн. Техникийн зориулалттай этилийн спиртийг яг юунд, ямар зориулалтаар ашигладаг юм бэ?

-Хөнгөн үйлдвэрийн салбар, жишээлбэл, хэвлэлийн үйлдвэр, арьс шир боловсруулах үйлдвэр, үслэг эдлэлийн, савхи, нэхий будах үйлдвэр, ноолуур, ээрмэлийн үйлдвэр, модон эдлэл, үнэртэн, гоо сайхны үйлдвэрлэл, нийтийн тээврийн үйлчилгээ үзүүлдэг компани, шил толь цэвэрлэдэг шингэн үйлдвэрлэл, барилгын хөөсөнцөр хавтан үйлдвэрлэхэд, барилга угсралтын болон уул уурхайн тоног төхөөрөмжийн цэвэрлэгээ зэрэгт түгээмэл ашигладаг. Үүнээс гадна хүнсний үйлдвэрийн тоног төхөөрөмж цэвэрлэх, засвар үйлчилгээ зэрэгт ашигладаг.

Этилийн спиртийн гар халдваргүйжүүлэх гель нь MNS:61592010 гээд Монгол Улсын стандартыг хангасан байх ёстой. Энэ стандартад гар халдваргүйжүүлэх гелийг хүнсний зориулалттай, тансаг зэрэглэлийн 96 хувийн хатуулагтай спиртээр хийнэ гэж заасан. Стандарт тогтоож өгсөн шалтгаан нь гар ариутгагч нь хүний арьс, салстад шууд хүрдэг учир эрүүл ахуйн аюулгүй байдал хангах ёстой. Нөгөөтээгүүр, гар халдваргүйжүүлэх гелийн этилийн спиртийн агууламж нь 62-82 хувьтай байх ёстой.

-Тэгэхээр техникийн этилийн спиртээр хийсэн гар ариутгагч нь чанарын шаардлага хангахгүй гэсэн үг үү?

-Стандартад тусгаагүй спиртээр үйлдвэрлэсэн гэдэг утгаараа чанарын шаардлага хангахгүй гэсэн үг. Коронавирусний халдвар дэгдсэн ийм цаг үед этилийн спиртийн хатуулга нь 70 хувиас дээш байх ёстой гэж байгаа шүү дээ.

Дээр нь хүн арьс, салстаараа амьсгалдаг. Зориулалтын бус зүйлээр үйлдвэрлэсэн бүтээгдэхүүнийг урт хугацаанд хэрэглэвэл харшил өгдөг болох, толгой өвдөх зэргээр сөрөг нөлөө үзүүлэх эрсдэлтэй. Ялангуяа коронагийн үед гар халдваргүйжүүлэгчийг тогтмол хэрэглэж байна. Ийм үед ийм эрсдэл гарахыг үгүйсгэхгүй.

Түүнчлэн Дэлхийн эрүүл мэндийн байгууллагын гар ариутгагч уусмал бэлтгэх зөвлөмж гэж бий. Үүнд хоёр төрлийн этилийн спирт ашиглана гэж заасан байдаг. Нэгдүгээрт, бидний шаарддаг 96 хувийн хатуулагтай хүнсний спирт. Нөгөөх нь изопорфелийн этилийн спиртээр хийнэ гэж бий. Гэхдээ техникийн зориулалтын этилийн спиртээр үйлдвэрлэж болно гэсэн зөвлөмж огт байхгүй.

-Шалгалтыг аль аль байгууллагаас, хэзээ хийсэн юм бэ?

-ХХААХҮЯ, Эрүүл мэндийн яам, Мэргэжлийн хяналтын ерөнхий газраас хамтарч өнгөрсөн гуравдугаар сарын 20-ноос энэ сарын 3-ны хооронд шалгалт хийсэн. Эдгээр гурван байгууллагаас Ариутгал, халдваргүйжүүлэх бодис үйлдвэрлэгч аж ахуйн нэгжийн үйл ажиллагаанд хяналт тавих удирдамж гаргасан. Энэ дагуу ариутгал, халдваргүйжүүлэгч бодис үйлдвэрлэхээр спиртийн зөвшөөрөл авсан ААН-д шалгалт хийсэн. Нийт 18 ААН хамрагдсан.

-Техникийн этилийн спирт ашигласан нь үнийн ялгаанаас болсон юм болов уу. Эсвэл үйлдвэрлэлд ашиглаж болно гэж бодсон юм болов уу?

-Яг нарийн шалтгааныг мэдэхгүй. Хүнсний зориулалттай спирт, техникийн зориулалттай этилийн спиртийн үнэ хоорондоо ялгаатай. Үүнээс болсон байхыг мэдэхгүй. Нөгөө талаасаа “Монос косметикс” ХХК-ийн зүгээс техникийн этилийн спирт ашиглснаа хүлээн зөвшөөрч, Зөрчлийн тухай хуулиар хариуцлага тооцох шийдвэрийг биелүүлсэн.

-Гар халдваргүйжүүлэгчтэй холбоотой гомдол танай байгууллагад ирж байсан уу?

-Ирж байсан. Шалгаж үзэхэд тогтвор суурьшилтай ажлын байр байхгүй ААН “Монос косметикс” компанийн нэг литрийн савалгаатай “Санитас” нэрийн бүтээгдэхүүнийг 30 мл-ээр савалж зарсан зөрчил илэрсэн.

-“Монос косметикс” гар халдваргүйжүүлэгч үйлдвэрлэх тусгай зөвшөөрөлтэй юу?

-Эрүүл мэндийн тухай хуулийн 19.3.7-д зааснаар тусгай зөвшөөрөлтэй ААН ариутгал, халдваргүйжүүлэх бодис үйлдвэрлэх эрхтэй. Гэтэл энэ зөвшөөрөл аваагүй байсан. Зөвхөн гоо сайхны бүтээгдэхүүн үйлдвэрлэх эрхтэй.

-Техникийн этилийн спирт ашигласан хоёр компани бий. Эдгээрт ямар арга хэмжээ авсан юм бол?

-Шаардлага хангахгүй бүтээгдэхүүнийг хураан авсан. Үйлдвэрлэсэн бүтээгдэхүүнээс дээж авч лабораторид шинжлүүлэхээр өгсөн. Хариу одоогоор гараагүй байна. Зөрчлийн тухай хуулиар гурван сая төгрөгөөр торгож, гар халдваргүйжүүлэгч үйлдвэрлэх процессийг зогсоосон.

-Нийт хэчнээн бүтээгдэхүүн битүүмжилж хурааж авсан бэ?

-“Монос косметик” компанийн үйлдвэрлэсэн 310 мл-ийн савалгаатай “Санитас” бүтээгдэхүүн 1296 ширхэг, “50 мл-ийн савалгаатай “Санитас” гар ариутгагч шүршигч-3360 ширхэгийг хураан авч лацадсан. “Нахиа импекс”-ийн хувьд үлдэгдэл байгаагүй гэсэн. Би энэ компанид шалгалтаар ажиллаагүй учир нарийн зүйлийг мэдэхгүй байна. Тиймээс холбогдох байцаагчаас нь тодруулах нь зүйтэй болов уу.

-“Монос косметикс” стандарт хангахгүй хэчнээн хэмжээтэй бүтээгдэхүүн үйлдвэрлэж, худалдаалсан тоо баримт бий юү?

-Тийм мэдээлэл одоогоор алга. Цаг үеийн нөхцөл шаардлагын улмаас үйлдвэрлэсэн бүтээгдэхүүн нь өдөртөө дуусдаг байсан гэдэг мэдээлэл бий. Биднийг очих үеэр дээр хэлсэн хэмжээтэй бүтээгдэхүүн байсан. Хэдэн өдрийн үлдэгдэл гэдгийг мэдэхгүй.

-Одоо тэгвэл “Санитас” үйлдвэрлэхгүй байгаа гэсэн үг үү?

-Яг тийм. Эхлээд тусгай зөвшөөрлөө Эрүүл мэндийн яамнаас авах ёстой. Тусгай зөвшөөрлөө авсны дараа үйлдвэрлэл эрхлэх эрхтэй болно. 

Г.Нацаг-Эрдэнэ