Улсын Их Хурлын Үйлдвэржилтийн бодлогын байнгын хорооны дарга Б.Чойжилсүрэн, Улсын Их Хурлын гишүүн Т.Аубакир, Т.Энхтүвшин, Ж.Мөнхбат нар Дорноговь, Өмнөговь аймгуудад ажиллаж байна. Байнгын хорооны гишүүд энэ үеэрээ Дорноговь аймгийн Өргөн сумын нутагт үйл ажиллагаагаа явуулж буй “Монцемент” ХХК-ийн үйл ажиллагаатай, стратегитай танилцлаа.
170 гаруй жилийн батлагдсан нөөцтэй “Сэнжит Худаг” шохойн чулууны ордыг түшиглэн барьсан уг үйлдвэр нь өдгөө жилд нэг сая тонн цемент, цементийн клинкер үйлдвэрлэх хүчин чадал бүхий дэлхийн хамгийн орчин үеийн дэвшилтэт, эко технологиудыг нэвтрүүлснээрээ онцлог.
Монгол улсын эдийн засаг, аж үйлдвэрлэлийн хөгжилд томоохон түлхэц үзүүлэх “Монцемент Билдинг Материалс” ХХК нь 2015 оноос үйл ажиллагаагаа эхлүүлсэн бөгөөд өдгөө 400 гаруй ажилтантай үйл ажиллагаа нь хэвийн үргэлжилж байгаа юм.
Тус компани орон нутгийн хөгжилд бүтээн байгуулалтын ажлыг нэлээдгүй хийжээ. Тухайлбал Өргөн суманд төлөвлөсөн орон сууцны хорооллын эхний ээлжийн 88 айлын барилгыг барьж, 2017 оны наймдугаар сард улсын комисст хүлээлгэн өгсөн байна. Мөн 1000 гаруй инженер техникийн ажилчдыг ажлын байраар хангаж, алслагдсан орон нутагт шинээр мэргэжлийн ур чадвар шаардах ажлын байр бий болгожээ. Энэ нь уул уурхайн бус хүнд үйлдвэрлэлийн салбарт мэргэжлийн боловсон хүчин бэлтгэх бааз болоод буй.
Монголд анх удаа Европын хамгийн орчин үеийн эко технологид суурилсан хуурай аргын жилд сая тонн Европ стандартын шаардлага хангасан бүтээгдэхүүн үйлдвэрлэх хүчин чадалтай үйлдвэрийг ашиглалтад оруулснаар Сайншандын аж үйлдвэрлэлийн цогцолборын үндэс суурь тавигдсан гэхэд нэг их хилсдэхгүй бизээ.
Жилд 60 орчим сая ам.долларын импортыг орлох бүтээгдэхүүн үйлдвэрлэж буй тус үйлдвэр нь гадаад худалдааны тэнцэлд эерэг нөлөө үзүүлэхээс гадна валютын урсгалыг эх орондоо үлдээхэд томоохон дэмжлэг үзүүлж байгаа юм.
Үүнээс гадна Монгол Улсын эрчим хүчний салбарт анх удаа таван мВт-д суурилсан хүчин чадалтай хаягдал хийг дахин боловсруулж, эрчим хүч үйлдвэрлэх үйлдвэр барьжээ.
Байгаль орчинд ээлтэй энэхүү үйлдвэр нь төвийн эрчим хүчний системээс ачааллыг 30 хувиар бууруулсан нь цаашид энэ төрлийн эрчим хүчинд хэмнэлттэй эко технологийг нэвтрүүлэхэд үлгэр жишээ үзүүлж байна.
ЦЕМЕНТ, КЛИНКЕР БОЛОН ЭРЧИМ ХҮЧНИЙ ЦОГЦ ҮЙЛДВЭР
Монцемент цогц үйлдвэр нь шохойн чулууны ил уурхай, цемент үйлдвэрлэх иж бүрэн 2 шугам, технологийн явцаас гарах хаягдал дулааныг дахин боловсруулж 5МВт цахилгаан эрчим хүч үйлдвэрлэх WHR систем болон Улаанбаатар хот дахь клинкер боловсруулах үйлдвэр зэргүүдээс бүрдэнэ.
Тодруулбал, энэхүү WHR систем нь хамгийн сүүлийн үеийн технологи юм. Европын холбооны улсад өдгөө Румын Улс 4.0 MW хүчин чадалтай “Holcim”, Словак Улсын 5.0 MW хүчин чадалтай Холсим, Герман Улсын 6.8 MWхүчин чадалтай Роердорфер зэрэг цөөн хэдэн үйлдвэр үйл ажиллагаандаа нэвтрүүлсэн байдаг аж.
УИХ-ын гишүүн Ж.Мөнхбат “УИХ-ын Аж үйлдвэрийн байнгын хорооны гишүүд, өнөөдөр “Монцемент” үйлдвэрт ажиллаж байгаадаа баяртай байна. Монгол Улс жилийн 2000 сая тонн цементний хэрэгцээтэй байдаг. Улс орны хөгжил бүтээн байгуулалттай салшгүй холбоотой. Түүний нэг бол барилгын материалыг дотооддоо үйлдвэрлэх асуудлыг шийдэх нь зөв. Үүнийг Засгийн газрын үйл ажиллагааны хөтөлбөрийг батлахдаа суулгаж өгсөн. Тиймээс газар дээр нь танилцаад явж байна.
Цаашдаа цементээр хангах аж ахуй нэгжүүдийн бүтээн байгуулалтыг дэмжих, шаардлагатай хөрөнгө оруулалт, санхүүжилтыг үе шаттайгаар шийдвэрлэх болно.
Өнөөдөр валютын ханшны өсөлтөөс болоод аж ажуй нэгжүүд хүндхэн байдалд орчихсон байгаа. Импортыг орлох бүтээгдэхүүн үйлдвэрлэж, ажлын байр бий болгож байгаа аж үйлдвэрүүдээ дэмжих ёстой. Дотоодынхоо хэрэгцээг импортоор биш өөрсдөө хангадаг бодлогыг УИХ бүх талаар дэмжих ёстой” гэдгийг онцолсон.
УИХ-ын гишүүн Б.Чойжилсүрэн “Үйлдвэржилтийн бодлогын байнгын хороо дотоодын үйлдвэрүүдэд тулгараад байгаа бэрхшээлтэй асуудлыг шийдэх, эрх зүйн болоод бизнесийн орчин бий болгоход төрийн бодлогыг чиглүүлэх зорилготойгоор байгуулагдсан. Манай улсын хувьд үйлдвэр эрхлэхэд туглардаг хамгийн том бэрхшээл бол валютын алдагдал байдаг. Энэ тал дээр хууль эрх зүйн актуудыг боловсруулаад явж байна. Намрын чуулган эхлэхээр УИХ-д өргөн барина” гэлээ.
Б.Жаргал
