Сарын эхээр олгодог хөнгөлөлттэй эмийг тухайн хорооны цөөн хэдхэн эмийн санд худалдаалгаас өдөртөө дуусчихдаг тул иргэд тэр дундаа ахмадууд үүрийн гэгээнээс эхлэн дугаарладаг. Бүтэн өдрийн ажил болж нэг сарын хэрэглээний даралт, зүрхний, сахарын, бамбай булчирхайн болон тархины эмээ базааж авна. Үүнээс гадна хэрэгцээт эмээ авахын тулд тухайн өрхийнхөө эмчид хандан бичилт хийлгэн, цахим санд нь бүртгүүлж, хороонд нь байх тийм эмийн сангаас аваарай хэмээн тусгайлан код өгдөг.

Мөн сарын сүүлч болоход хөнгөлөлттэй үнээр авах эмийн жороо амжиж бичүүлэх гэсэн хүмүүсээр өрхийн эмнэлэг дүүрдэг. Өрхийн эмч нар ч энэ бүхэнд түүртэн элдвээр цааргалах, хүнд суртал гаргах, хойш суух гээд асуудал мундахгүй.

Тэгвэл иргэд арваннэгдүгээр сарын 1-нээс өрхийн эмнэлгийн эмч дээрээ жор бичүүлэх гэж дугаарлах шаардлагагүй болж байна. Та харьяа дүүрэг, хорооныхоо аль ч эмнэлгийн эмч дээр очин хөнгөлөлттэй эмийн жороо бичүүлж болно.

Тодруулбал, зүрх, судасны эмчид үзүүллээ гэхэд хөнгөлөлттэй эмийн жагсаалтад орсон эмийг хөнгөлөлттэй үнээр нь бичүүлж, цаашлаад дурын эмийн сангаасаа авах боломжтой боллоо гэсэн үг. Түргэн тусламжийн эмч ч хөнгөлөлттэй эмийн жорыг бичиж өгөх эрхтэй болсон нь сайхан мэдээ. Харин эрэлт хэрэгцээгээ мэдэрсэн, ахмадуудын чирэгдлийг үгүй хийсэн энэхүү шийдвэрийг арваннэгдүгээр сарын 1-нээс зохих ёсоор нь хэрэгжүүлээсэй билээ.