МУГЖ С.Жавхлан энэ сарын 26-ны өдөр буюу ирэх бямба гарагт “Монголоороо байгаасай” уран бүтээлээрээ тайзнаа эргэн ирэх гэж байна. Тэрбээр өчигдөр Төв цэнгэлдэх хүрээлэнд болох тоглолтынхоо талаар сэтгүүлчдэд мэдээлэл өгсөн юм. Энэ үеэр С.Жахлангаас зарим нэгэн зүйлийг тодрууллаа.

Шаардлагатай бол би нутгийнхандаа тайзан дээрээс мэндчилгээ дэвшүүлнэ

-Сайн байна уу. Урлагийн тайзнаа эргэн ирж, тоглолтоо хийх гэж байгаад баяр хүргэе. Тоглолтынхоо талаар товч танилцуулахгүй юу?

-Дөрвөн жилийн дараа үзэгч олонтойгоо учран золгох гэж байгаадаа баяртай байна. “Монголоороо байгаасай” тоглолтод миний хайрлаж, шүтэж явдаг уран бүтээлчид оролцоно. Энэхүү тоглолтыг монгол хүн бүр ирж үзээсэй. Монголчууд яаж уухайлан дуулж, хурайлдаг, нэгдэн цуглаж чаддагийг харуулахыг зорьж байгаа. Тиймээс Монголоо гэсэн зүрх сэтгэлтэй бүх хүнийг урьж байна. Сая монголын төр онигоо болсон шиг 26-ны өдөр би ганцаараа тайзан дээрээ байвал онигоо болно шүү. Залуучууддаа уриалж хэлэхэд “Монголоороо байгаасай” гээд монголчууд яаж дуулж, цэнгэдгийг дэлхийд харуулъя гэж хэлмээр байна.

-Та УИХ-ын сонгуульд Увс нутгаасаа нэр дэвшээд сонгогдоогүй. Үүнийхээ дараа увсынханыг “Миний дууг битгий дуулаарай” гээд газар ташуурдаж бухимдалаа илэрхийлсэн шүү дээ.  Тэгэхээр энэхүү тоглолтыг увсынхан үзэж болох уу?

-Энэ бол цаг хугацааны л асуудал байсан. Би тухайн үед бухимдаад тэгж хэлсэн. Ер нь хэдэн мянган тонны том шанагаар газар шороо ухаад олборлолт явуулах, газар ташуурдаад өнгөрөх асуудал хоёр ямар ялгаатай гэдгийг бодох асуудал. Энэ зүйлийг хов болгож яриад байгаа хүмүүс ирээд тоглолт үзээрэй, хамтдаа дуулъя гэж хэлмээр байна. Үнэхээр шаардлагатай бол би нутгийнхандаа тайзан дээрээс мэндчилгээ дэвшүүлнэ.

Монгол Улс хятадын өмнө гөлөг болж байна

-Та УИХ-ын сонгуульд ямар шалтгаанаар өвдөг шороодсон гэж харж байгаа вэ?

-Би сонгуульд ерөөсөөн өвдөг шороодоогүй. Харин ч босч ирсэн. Хүмүүс намайг сонгогдоогүй болохоор ууралсан гэж бодоод байх шиг байна. Мэдээж зүтгэж байсан үйл хэрэг нь бүтэхгүй бол хэн ч бухимдана шүү дээ. Энэ завшааныг ашиглаад хэлэхэд хүмүүс аливаа зүйлийг гэгээлэгээр олж харж байгаасай гэж хүсч байна. УИХ-д сууж байсан нөхдүүд суудлаасаа буугаад шоронд орж байхад С.Жавхлан тайзан дээрээ гараад дуулж байна. Хамгийн гол асуудал энэ л байхгүй юу.  

-С.Жавхлан гэх хүн ер нь бухимдалаа хурц илэрхийлэх юм. Хамгийн сүүлд гэхэд Өвөрмонголын хэл бичгийн асуудал хөндөгдөхөд хятад сургуулиудыг хаах ёстой хэмээн мэдэгдсэн. Энэ талаар?

-Саяхан БНХАУ-ын Гадаад хэргийн сайдын айлчлалын үеэр Монгол Улс тусгаар тогтносон улс гэхэд үнэхээр арчаагүй байдалд орж гөлөг боллоо. Тэр бол үнэхээр гутамшигтай онигоотой зүйл. Угтаа бол бид тусгаар тогтносон улс болохоор “Та нар яагаад бидний аханд дүүсийг дээрэлхээд байна” гээд зоригтой хэлчих байсан юм. Гэтэл өвөг дээдсээс уламжлан ирсэн өв соёл, монгол хэл бичигтээ хайргүй юм шиг аашлах нь үнэхээр гутамшигтай санагдсан. Шуудхан хэлэхэд хятад сургуулиудыг хаах ёстой. Өвөрмонголчууд хэл бичгийнхээ асуудлаар надруу олноороо ярьж, уйлж байна. “Бид хэл бичигээ авч үлдэж чадахгүй нь. Монголчууд та нар маань авч үлдээч” гээд уйлж байна шүү дээ.  

-Та дахин УИХ-д нэр дэвших бодол байгаа юу?

-Яг өнөөдөр шууд хэлэх боломжгүй байна. Цаашид байдал хэрхэн өрнөхийг харж байгаад шийднэ дээ.

Б.Батчимэг