Өнгөрсөн долоо хоногийн онцлох үйл явдал Ерөнхий сайд асан С.Баяр, Сангийн сайд асан С.Баярцогт нарын ялыг 2-5 жилээр бууруулсан явдал байлаа.

Тодруулбал, Нийслэлийн Эрүүгийн хэргийн давж заалдах шатны шүүх өнгөрсөн баасан гарагт хурадаж С.Баярцогтод оноосон 10 жилийн ялыг 4.8 жил болгон өөрчилжээ. Харин Б.Бямбасайхан, Д.Ганболд нарт оноогоод байсан дөрвөн жилийн ялыг нэг жил гурван сар болгон өөрчилсөн бол Б.Ариунсан, Б.Бадрал нарт оноосон 1.6 жил хорих ялыг нэг жил болгон бууруулсан.

Мөн өдөр Ерөнхий сайд асан С.Баяр, Ч.Давааням  нарт холбогдох шүүх хурал болсон. Улмаар Нийслэлийн Эрүүгийн хэргийн давж заалдах шатны шүүх Чингэлтэй дүүргийн эрүүгийн хэргийн анхан шатны шүүхийн шийдвэрт өөрчлөлт оруулан С.Баярт оноосон таван жилийн хорих ялыг өөрчлөн хоёр жил зургаан сар болгон бууруулаад буй.

Тэднийг эрх мэдэл, албан тушаалаа урвуулан ашиглан бусдад давуу байдал бий болгосон, улсад хүнд хохирол учруулсан хэргээр анхан шатны шүүхийн шийдвэрээр 5-10 жилийн ял оноосон ч давж заалдах шатны шүүхээс тус бүрийнх нь ялыг хөнгөлөв. Оюутолгойн гэрээтэй холбоотой асуудлаар улстөрчид өөр өөрийн байр суурийг илэрхийлдэг. Оюутолгойн гэрээ анхнаасаа зөв эсвэл буруу болсон эсэхэд цаг хугацаа жинхэнэ шүүгч болно. Харин шүүхийн шийдвэр эцсийн шийдвэр байх учиртай тул өнөөдрийн хувьд тэд “гэмт хэрэгтнүүд”.

Одоо хэлэлцээний ард суухдаа алдсан алдаагаа давтахгүй байх нь л чухал юм.

Саяхан даа, Ерөнхийлөгч асан Ц.Элбэгдорж улс төрийн нөлөө бүхий 14 ял авсан этгээдийг “уучилж” суллахыг одоогийн Ерөнхийлөгчид зөвлөсөн. Үүний эхлэл нь С.Баяр, С.Баярцогт нар юм биш байгаа гэж хардах хүн олон байна. Магад хөнгөрүүлсэн ялыг дараагийн удаа хүчингүй болгож ч мэднэ.  

Өмнө нь улсад их хэмжээний хохирол учруулсан, банк бус санхүүгийн байгууллагаараа дамжуулан мөнгө угаасан хэргээр ял сонссон УИХ-ын гишүүн асан Б.Ундармаад оноосон 2.6 жилийн ялыг хүчингүй болгож, 40 сая төгрөгөөр торгоод сулласан. Өөрөөр хэлбэл, улсад их хэмжээний хохирол учруулсан, эрх мэдэл, албан тушаалаа урвуулан ашигласан хэргээр ял сонссон улстөрчдийн ял ч мөн адил хөнгөрч, хүчингүй болж магадгүй байна. 

Б.Лхам