Улаанбаатар хотын өсөн нэмэгдэж буй дулаан, цахилгаан эрчим хүчний хэрэгцээг хангах стратегийн ач холбогдол бүхий Дулааны тавдугаар цахилгаан станц (ДЦС-5) төслийн барилга угсралтын ажлыг эхлүүлэх бэлтгэл ажлууд эрчимжиж байна. Төслийг төр, хувийн хэвшлийн түншлэлийн хүрээнд хэрэгжүүлж байгаа бөгөөд хувийн хэвшлийн түншлэгчээр “Митайм Интернэйшнл” компани ажиллаж байна.

ДЦС-5 нь 300 МВт цахилгаан, 340 Гкал/ц дулааны эрчим хүч үйлдвэрлэх хүчин чадалтай станц бөгөөд Улаанбаатар хотын дулаан хангамжийн эх үүсвэрийг нэмэгдүүлж, хотын баруун бүсийн өсөн нэмэгдэж буй дулааны хэрэглээг хангахад чухал ач холбогдолтой төсөл юм.

Төслийн бэлтгэл ажлын хүрээнд газар чөлөөлөлт, дэд бүтцийн шийдэл, техникийн нөхцөл, зураг төслийн ажлууд үе шаттайгаар хийгдэж байна. Мөн төслийн талбайд геологийн судалгааны өрөмдлөгийн ажлууд хийгдэж дууссан бөгөөд станцын үндсэн тоног төхөөрөмжийн захиалгууд хийгдээд байна.

Түншлэлийн гэрээний нийт хугацаа 27.5 жил бөгөөд үүнээс 2.5 жил нь барилга угсралтын хугацаа, 25 жил нь ашиглалтын хугацаа байна.

Төслийн барилга угсралтын ажлын гүйцэтгэл, чанар, тоног төхөөрөмжийн туршилт тохируулга, ил далд ажлын баталгаажуулалт, ашиглалтад хүлээн авахад шаардагдах баримт бичгийн бүрдлийг хангуулах зэрэг захиалагчийн өдөр тутмын хяналтыг хэрэгжүүлэх хүрээнд Нийслэлийн иргэдийн Төлөөлөгчдийн Хурлын шийдвэрээр “Дулааны тавдугаар цахилгаан станц” ОНӨААТҮГ-д төслийн барилгын ажилд захиалагчийн хяналтыг хэрэгжүүлэх чиг үүргийг олгож, Нийслэлийн Засаг даргын захирамжаар холбогдох эрхийг олгосон. Үүнтэй зэрэгцэн түншлэлийн гэрээний салшгүй хэсэг болох хавсралт гэрээ, төлөвлөгөөнүүдийг боловсруулж баталгаажуулах ажлууд үргэлжилж байна.

ДЦС-5 нь дараах технологийг ашиглаж байгаль орчны сөрөг нөлөөллийг бууруулна. Үүнд:

• Эргэлтэт буцламтгай үет шаталттай зуух ашиглан агаар мандалд хаягдах азотын болон хүхрийн ислийг бууруулна;
• Агаарын хөргөлттэй конденсатор болон хаягдал ус боловсруулах системтэй тул усны хэрэглээг бууруулна;
• Үнсийг хуурайгаар зайлуулах технологитой тул үнсийг барилгын материалд ашиглах боломжтой;