Гэр бүлийн хүрээнд танхайрсан,  улаан гэрлээр гарсан, гудамжинд нус цэрээ хаясан, хурд хэтрүүлсэн, олон нийтийн амгалан тайван байдлыг алдагдуулсан, зүй бусаар биеэ авч явсан гээд иргэдийн болгоомжгүй нэг үйлдэл, хөдөлгөөн бүр өнөөдөр зөрчил болж байна. Зөрчлийн тухай хуулиар энэ бүхэнд торгуулийн арга хэмжээ авахаар зохицуулж, зөрчил бүрийг мөнгөн дүнгээр үнэлсэн байдаг. Мэдээж  буруу зүйл хийсэн бол торгох нь зүйн хэрэг. Хамгийн гол нь болгоомж, санамсаргүй үйлдэл бүрийг зөрчил гэж харан, иргэдийнхээ халаасыг тэмтчиж байгаад иргэд дургуйцэж байгаа юм.

Зөрчлийн тухай хуулийг хэрэгжүүлж эхэлсэн гурван жилийн хугацаанд давхардсан тоогоор, 5,2 сая хүнд шийтгэл ногдуулсан байна. Хэдэн тэрбумаар нь торгож, улсын төсөвт хачирладаг ч энэ нь иргэдийн хувьд ихээхэн дарамт, шахалт болж байгаа юм. Тиймдээ ч  иргэдийн шахалтаар Зөрчлийн тухай хуулийг шинэчлэх нь зүйтэй гэдэгт ХЗДХЯ санал нэгджээ. Ялангуяа ял шийтгэлийн бодлогод уян хатан байхаар зохицуулж байгаа аж. Тодруулбал, байгууллага цахилгааны зөрчил гаргалаа гэхэд торгохыг илүүд үздэг байсан. Харин одоо 7-14 хоногийн хугацаа өгч, зөрчлөө арилгахыг сануулдаг. Гэртээ анх удаа танхайрсан хүнийг юу юугүй баривчилдаг, торгодог байсан бол одоо сануулан, албадан сургалтад суулгах, торгуулиа хугацаанд нь төлсөн тохиолдолд 50 хувиар хөнгөлдөг байх зохицуулалтыг оруулахаар ярилцаж эхэлжээ. 

Зөрчлийн тухай хуулийн дийлэнх буюу 87 хувийг зам тээврийн зөрчил эзэлдэг байна. Тэд торгоод байдаг, харин эргэн төвлөрүүлэлт хангалтгүй байгааг дараахь тооноос харж болно. Тээврийн цагдаагийн албанаас Зөрчлийн тухай хуулийг хэрэгжүүлж эхэлснээс хойш шийтгэлийн мэдээллийг гаргахад,

-2017 онд 575 мянга 956 хүнд шийтгэл оногдуулж, 17 тэрбумын торгууль ногдуулсан ч 5,6 тэрбумыг нь төлөөгүй,

-2018 онд 1,4 сая хүнд шийтгэл ногдуулж, 39,7 тэрбумаар торгосон ч  18,9 тэрбумыг төлөөгүй,

-2019 онд 2 сая иргэнийг 55,6 тэрбумаар торгосон ч 31,8 тэрбумыг төлөөгүй, 

-2020 оны эхний зургаан сарын байдлаар 1,1 сая хүнд шийтгэл ногдуулж, 27,8 тэрбумаар торгосон ч  9,1 тэрбумыг  нь төлөөгүй байх жишээтэй байна.

Торгоод, торгуулаад үр дүн харагдахгүй байгаа учраасЗөрчлийн тухай хуульд өөрчлөлт, шинэчлэлт хийх зайлшгүй шаардлагатайг харуулж байна.

У.Тэргэл