УЕП-ын дэргэдэх Мөрдөн байцаах албыг 2014 онд татан буулгасан ба шалтгааныг нь олон жил ярьж ирсэн. Ажил үүргээ хэвийн гүйцэтгэж байсан алба хаагчдыг нэг л өдөр гудамжинд гарган, АТГ-т  үйл ажиллагааг нь шилжүүлсэнд улс төр орлоо гэж тус газрын даргаар 11 жил ажилласан Б.Галдаа прокурор хэлж байсан билээ.

Энэ цагаас хойш өнөөдрийг хүртэл  тусгай субьектыг сэргээх талаар олон жил ярьж ирсэн ч бодитоор биелсэн нь үгүй байна. Харин УЕП-ын дэргэдэх Мөрдөн байцаах албыг яагаад гэнэт татан буулгах болсон талаар Хууль зүйн сайд Х.Нямбаатар “Н.Алтанхуяг гишүүнийг Ерөнхий сайд байхад Улсын ерөнхий прокурор нь хэргээ зохимлоор үүсгэдэг, өөрөө хянадаг жинхэнэ хонгилын эзэн болчихоод байсан учраас татан буулгахаас аргагүйд хүрсэн шүү дээ” гэв.

Ухрааж үзвэл, 2014 онд Улсын ерөнхий прокуророор Д.Дорлигжав ажиллаж байв. Түүнийг  албан тушаалаа урвуулан ашиглаж бусдыг дарамталсан хэрэгт холбогдуулан эрүү үүсгэн шалгасан байдаг.

Тодруулбал, тэрбээр дүү Д.Баатарынхаа дансаар “Алтандорнод” ХХК-ийн ТУЗ-ийн дарга Т.Ганболдоос эрх мэдэл, албан тушаалаараа далайлган сүрдүүлж дөрвөн сая ам.доллар шилжүүлж авсныг хууль, хяналтын байгууллага нь шалгаад тогтоочихсон билээ.

Энэ байтугай бизнесмэнүүдийг албан тушаалаараа далайлгадаг, хүссэнээ авдаг байсан талаар олон жишээ байдаг. Тиймээс хонгилын жинхэнэ  эзэн нь  өнөөдөр бодитоор тодорч, хууль хүчний байгууллагын толгойд “суусан” эрхэм ч үүнийг нотоллоо.

У.Тэргэл