Монгол Улсын Ерөнхийлөгч Х.Баттулга “Салхитын мөнгөний орд”-ын хэрэгт орооцолдсон нэр бүхий 17 шүүгчийн бүрэн эрхийг түдгэлзүүлэх зарлигийг 2019 оны зургаадугаар сарын 26-ны өдөр гаргаж байв. Нийгэм ч сүр дуулиантайгаар хүлээн авч, шүүгчид авлигачид хэмээн цоллодгийг баталгаажуулсан билээ. 17 бус нийт шүүгчдийн нэр хүндийг шороотой хутгасан энэхүү шийдвэр авлигач шүүгчдийг илрүүлсэн үү гэвэл, илрүүлсэн. Гэхдээ эргэж, буцсан нь олон. Харин өнөөдөр 17 шүүгчийн хувь заяа хаашаа эргэв. Нэхэн сурвалжиллаа.

Салхитын мөнгөний ордын маргааныг шүүхээр шийдвэрлэхдээ 10-170 сая төгрөгийн хахууль авсан хэрэгт Улсын Дээд шүүхийн Иргэний хэргийн танхимын шүүгч Ц.Амарсайхан, Г.Цагаанцоож, Д.Цолмон, Чингэлтэй дүүргийн Иргэний хэргийн танхимын Ерөнхий шүүгч Б.Сайханцэцэг, Захиргааны хэргийн Давж заалдах шатны шүүхийн шүүгч Э.Халиунбаяр, Сонгинохайрхан дүүргийн Иргэний хэргийн танхимын Ерөнхий шүүгч Б.Цолмонбаатар нарыг авлигын хэрэгт холбогдуулан шалгасан.  Харин эдгээрээс шүүгчдэд хахууль өгөхөд зуучилсан Э.Халиунбаярт гурав, авлигын хэргийг голлон зохион байгуулсан Б.Цолмонбаатарт шүүхээс таван жилийн хорих ял оноосон юм. 

Улсын Дээд шүүхийн шүүгч Ц.Амарсайханы хувьд БНСУ-д эмчлүүлэхээр явсан тул хэргийг нь тусгаарлан шүүхээр, Ерөнхий шүүгч асан Б.Сайханцэцэг хэргийн оролцогчоос авсан мөнгөө зээлсэн хэмээн мэдүүлж дөнгөсөн тул хэргийг нь мөн тусгаарлан шүүхээр болсон байдаг. Харин бүрэн эрхийг нь түдгэлзүүлмэгц Нийслэлийн Захиргааны хэргийн анхан шатны шүүхийн шүүгч Ц.Төмөрбат АНУ-руу оргон зайлсан бол шүүгч Д.Цолмон, Г.Цагаанцоож нарыг шүүхээс цагаатгасан байна.

Энэ дагуу Монгол Улсын Ерөнхийлөгч Улсын Дээд шүүхийн шүүгч Готовдоржийн Цагаанцоож, Дашхүүгийн Цолмон нарын бүрэн эрхийг саяхан сэргээсэн бол өмнө нь  Х.Сонинбаяр, Ж.Оюунтунгалаг, П,Золзаяа, Д.Дэлгэрцэцэг, Д.Байгалмаа, Б.Нармандах, Т.Энхжаргал нарын долоон шүүгчийн бүрэн эрхийг сэргээсэн билээ. Хамгийн харамсалтай нь,Улсын Дээд шүүхийн шүүгч, Гавьяат хуульч Л.Бямбаа ”Салхитын мөнгөний орд”-ын авлигын хэрэгт холбогдон шалгуулж байхдаа амиа хорлосон юм.

Ерөнхийлөгчийн авлигын хэрэгт холбогдуулан бүрэн эрхийг нь нэг дор түдгэлзүүлсэн  шүүгчдээс хоёр нь ял авч, есийнх нь бүрэн эрхийг сэргээж, хоёр шүүгчид холбогдох хэргийг тусгаарлан шүүхээр болж, нэг нь оргон зугтсан, нэг нь БНСУ-д эмчлүүлэхээр явсан зэргээр нөхцөл байдал өнөөдөр ийм байна.

У.Тэргэл