"Магнай трейд" группийн ерөнхийлөгч Б.Ганзоригийн бага хүү Г.Содбаяр бусдын биед ноцтой гэмтэл учруулсан талаарх мэдээллийг хохирогч гэгдэх Ю.Кундыз хэмээх бүсгүй өөрийн цахим хуудсаараа дамжуулан олон нийтэд хүргэсэн талаар бид өмнө нь мэдээлсэн билээ.

Тэгвэл бусдын биед халдаж, гэмтэл учруулж, танхайрсан гэгдэж буй МТ группийн ерөнхийлөгч Б.Ганзоригийн хүү Г.Содбаяр өөрийгөө гэм буруугүй хэмээн хэвлэлд ярилцлага өгч, цахим хуудснаа нэлээгүй “сэвж” эхлэв.

Тэрбээр “Ю.Кундыз бид хоёр нэг жилийн өмнө танилцсан. Өнгөрсөн хугацаанд бид хайр дурлалын харилцаатай байгаагүй, хөнгөн харилцаатай байсан. Тэр бүсгүйг найзууддаа болон ээж, аавдаа ч танилцуулж байгаагүй. Өмнө нь би тэмцээн, уралдаанд ороход нь санхүүгээр дэмждэг байсан. Гэхдээ хэзээ ч миний найз охин байгаагүй.

Би алгадаж, цохиогүй, чимхээгүй, хуруу ч хүрээгүй. Уурлаад над руу дайраад байхаар нь би түлхсэн. Тэгэхэд эвгүй унасан юм шиг байна лээ. Гэрээс гарахдаа надаас хариугаа авна, сошиалд нэр нүүргүй болгоно гэж хэлээд, хаалга өшиглөөд гарсан. Дараа нь над руу залгаснаа “Би чамаас 50 сая төгрөг нэхэмжилнэ. Чи миний карьерыг будаа болголоо. Би асрагч хөлсөлнө. Хагалгаанд орно” гэх мэт олон төрлийн зардал ярьсан. Хариуд нь би “Шаардлагатай эмчилгээний бүх зардлыг төлнө” гэж хэлсэн.

Ю.Кундызын энэ бүх үйлдэл нь манай компанийн нэр хүнд, миний гэр бүлийн нэр төрд халдсан халдлага. Монголд хууль үйлчилдэг бол би шүүхээр явна. Гэхдээ үүгээрээ би мөнгө төлөхгүй гэж байгаа юм биш. Харин 50 сая төгрөг өгнө гэдэг бол шударга бус гэж бодож байна” гэх зүйлийг өгүүлжээ.

Харин гэмтэж бэртсэн гэх Ю.Кундыз “Г.Содбаяр мөнгөтэй учраас хийсэн хэргээ далдлах гэж хичээж, миний гэмтлийг хуучин гэмтэл гэх мэтээр оношлуулахаар хөөцөлдөж эхэлсэн байна” гэх мэдээллийг өмнө нь цахим хуудсаараа дамжуулан хүргэж байсан билээ.

Харин дээрх мэдээллүүд цахим орчинд иргэдийг хоёр талцуулаад байгаа юм. Тодотговол, зарим нэг нь “Мөнгөтэй айлын, эрх хүүхдүүд үргэлж ийм зүйл ярьж, танхайн хэргээ дарагдуулж, "цэвэр" үлдэх юм” хэмээн Г.Содбаярыг буруутгаж буй. Харин нөгөө хэсэг нь “Ю.Кундызын үйлдэл угаасаа ёс зүйгүй. Хоорондоо учраа олохгүй цахим орчинд бичиж, харилцаагаа ил болгоод” гэх мэтээр шүүмжилж байна.

Ямартай ч эл асуудлыг хууль шүүхийн байгууллага анхааралдаа авч, буруу зөвийг дэнслэх нь гарцаагүй. Түүнээс цахим орчин болоод хэвлэл мэдээлэлд ярилцлага өгөөд буруу зөв нь дэнслэгдэхгүй нь ойлгомжтой. 

Үнэхээр хэн нэгэн хүчирхийлэл үйлдэж, эмэгтэй хүний биед халдсан, хүнд гэмтэл учруулсан бол мөнгөтэй байлаа гээд цэвэр үлдэж, “ялаас” мултрах ёсгүй. Харин үнэхээр гэмтэл аваагүй байж цахим орчинд худал мэдээлэл тараасан бол Ю.Кундыз ч мөн хариуцлага хүлээх нь дамжиггүй юм.  

Б.Баатар