Ажлаас халчихлаа, удалгүй шүүхийн шийдвэрээр ажилдаа орчихлоо гэдэг ийм явдал төрийн албанд улиг болсон. Ялангуяа төр, засгийн харьяа агентлагуудад олон тохиолддог.

Хамгийн гол нь ажлаас хууль бусаар халжээ гэсэн шийдвэр шүүхээс гаргасан бол тухайн хүний ажилгүй байсан хугацааны цалинг төрөөс эхэлж барагдуулаад, дараа нь буруутай албан тушаалтнаас нэхэмжилдэг ийм буруу тогтолцоо өнөөдрийг хүртэл явж ирсэн билээ.

Гэвч албан тушаалтнууд төлсөн нь нүдний гэм. Харин ч төл гэх шаардлага тавьж ирсэн шүүхийн шийдвэр гүйцэтгэгчдийг үл тоодог, хэл амаар доромжилдог ийм явдал газар аваад байсан юм.

Жишээ нь, 2020 онд гэхэд л  514 хүн ажлаас хууль бусаар халлаа хэмээн шүүхэд хандсанаас 80 хувь нь заргаа авч, албан тушаалтнуудын буруу үйлдлээс үүдсэн хохиролд төр 1,2 тэрбумыг төлсөн байна.

Харин энэ мөнгийг эргүүлсэн төлсөн, буруугаа ухаарсан албан тушаалтан үгүй.

Өнгөрсөн хугацаанд буюу 2006-2020 онд улсын төсвөөс 66,5 тэрбум төгрөгийг энэ төрлийн маргаанд зориулжээ. Энэ нь та, бидний төлдөг татварын  мөнгө юм. Тэрний, энэний хүн гээд халж сольдог явдал газар авч ялангуяа сонгуулийн дараа идэвхждэг.

Дарга нар ажилтнаа дургүйгээ хүрэхээр халчихдаг, шүүх нь болохоор халсан нь хууль зөрчсөн байна, цалинг нь нөхөж олго гэдэг шийдвэр гаргачихдаг, харин үүний хохирогч нь татвар төлөгчид юм.

Тиймээс Төрийн албаны тухай хуульд өөрчлөлт оруулж, 2021 оны нэгдүгээр сарын 1-нээс төрийн албан хаагчийг хууль бусаар халсныг нь тогтоовол төрд учирсан хохирлыг шийдвэр гаргасан албан тушаалтан өөрөө нөхөн төлөхөөр болж байна. Тодруулбал, төрөөр дамжихгүй гэсэн үг юм. Ингэснээр төрийн албаныхны баруун, солгойгүй, үндэслэлгүйгээр  ажилтнаа халдаг халдаг, чөлөөлдөг явдал цэгцэрнэ гэж үзэж байгаа юм. 

У.Тэргэл